2015: Un añu decisivu

Escomencipia un añu que va ser movíu no político, con delles convocatories eleutorales que van decidir la configuración del poder nos nuesos conceyos, nel gobiernu del país y nel del estáu. Too apunta a que van producise cambeos importantes cola apaición de fuercies polítiques nueves y la reconfiguración del repartu de votos.

Ye nel campu políticu onde más va xugase’l futuru del asturianu, la so supervivencia. Y de lo bien que seyamos quien a convencer a toles fuercies polítiques nel necesariu consensu a favor de la normalización y la oficialidá del asturianu, va depender en gran parte’l futuru del idioma nesta etapa nueva que paez que se ta abriendo na política.

Nós, como siempres dende la nuesa postura apartidista, taremos sollertes a la configuración de los programes electorales, collaborando pa que seyan lo más ambiciosos posibles en toles fuercies polítiques. Taremos trabayando tamién pa xenerar consensos alredor del asturianu, pa siguir faciendo d’esta causa xusta, una causa amable, cada día más popularizada y asumida por toos cola importancia que tien p’Asturies caltener esti idioma. Y por supuestu, tres les elecciones, siguiremos sollertes al cumplimientu de los programes.

Tócanos convencer a los ciudadanos pa que la cuestión llingüística, ensin ser la única pa decidir el so votu, sí seya condición indispensable pa tener en cuenta a una formación a la hora de da-y el votu. La oficialidá ye l’oxetivu irrenunciable, pero non como fin en si mesmu, sinón como ferramienta necesaria pal posterior procesu de normalización que tien de ponese en marcha. En 2015 aguardamos cuntar contigo, con tola sociedá, pa que l’asturianu pueda facese coles ferramientes necesaries pa da-y la vuelta al procesu qu’anguaño ta llevándolu al desaniciu en pocos años.

Fonte: Iniciativa pol Asturianu