Un añu de televisión 100% n'asturianu

Prestaríanos celebrar nesti xineru de 2015 un añu d’emisiones 100% n’asturianu na radiotelevisión pública. Pero magar los pasinos daos esti añu con unes mínimes esperiencies col doblaxe y la programación infantil, ente otros conteníos, la RTPA sigue siendo un mediu de comunicación estrañu, fuera de lo común nun territoriu con llingua propia. Gallegos, vascos, catalanes, baleares… toos tienen una televisión cola so llingua propia como llingua principal de la mesma.

Siguimos viendo imprescindible que la RTPA seya un mediu que sirva pa normalizar l’asturianu y non p’agrandar la diglosia y la marxinalidá del asturianu, como llingua pa la chancia, pa lo poco serio, namás pa lo rural y lo tradicional nel meyor de los casos. Sicasí, mientres trabayamos pa consiguilo contra la falta de voluntá política y la rocea pa col asturianu de los sos responsables, nun podiamos tar paraos.

La sociedá civil respuende con fuercia a esta falta de proyectu seriu pa la RTPA cola apaición d’Alderiques d’Asturies, el proyeutu de televisión 100% n’asturianu que ñació de la primer esperiencia de nueso nos medios, Iniciativa pol Asturianu nes ondes. Un programa de radio selmanal que consiguimos emitir en más d’una docena d’emisores nel territoriu asturianu  y que lleva yá un llargu camín, siendo voceru de la situación del asturianu y tolo qu’arrodia a la nuesa llingua.

Dende Iniciativa pol Asturianu, y en collaboración con Infoasturies y Conocer Asturias  siempres vimos nel proyectu d’Alderiques d’Asturies un elementu imprescindible pa la comunidá asturfalante, p’Asturies en xeneral. Y un añu más tarde nun podemos tar más satisfechos del llabor desendolcáu. Una televisión, que magar los pocos medios colos que cuntamos, ye digna, plural y cada vegada con más conteníos variaos.

Celebramos esti aniversariu cola seguranza de que ye’l primeru de munchos y namás l’entamu d’una profesionalización cada vegada mayor. El perfectu exemplu del lema col que ñació Iniciativa pol Asturianu, “Toma la inciativa”, porque nesti ámbitu, como en tantos, va tocanos siguir reclamando l’acción de les alminsitraciones públiques, pero tamién, como ciudadanos concienciaos y responsables, ponenos al llabor y ufrir a la sociedá lo que los poderes públicos-yos niega.

Fonte: Iniciativa pol Asturianu