Asturies va pidir esti día nel real decretu d'especialidaes la especialidá l'asturianu y retrasar la LOMCE xunta Andalucía y Canaries

14/01/2015
Les comunidaes autónomes d'Andalucía, Canaries y Asturies volverán pidir al ministru d'Educación, Cultura y Deporte, José Ignacio Wert, na Conferencia Sectorial d'Educación que se celebra esti miércoles, que retarde la implantación de la Llei Orgánica de Meyora de la Calidá de la Educación (LOMCE) na Educación Secundaria y en Bachilleratu porque consideren que nun hai tiempu nin dineru abondo p'aplicala y qu'esisten una serie de "llagunes". Y Asturies va xuntar a esi pidimientu la desixencia de que nel real decretu d'especialidaes del oficiu docente pueda definise como especialidá l'asturianu. Nuna rueda de prensa conxunta, el conseyeru d'Educación y Cultura de la Xunta d'Andalucía, Luciano Alonso, afirmó que'l ministru puede escoyer ente "faer les coses bien y de forma consensuada" coles comunidaes o "siguir ampliando la sienda de los disparates", tres empecipiase la implantación en tres cursos d'Educación Primaria y na Formación Profesional Básica nel cursu 2014-2015. Alonso criticó la "azotada" puesta en marcha nel actual cursu académicu en Primaria y la desigualdá que, na so opinión, favoreció la llei ente los alumnos. Sobre la FP Básica, dixo que fracasó " nos sos oxetivos", porque esti cursu quedaron vacantes "miles de places", y que les autonomíes nun vieron "nin un solu euru" de los prometíos pol Ministeriu pal so financiamientu. Nesti contestu, apuntó que la LOMCE ye la primer llei d'educación que s'aprueba n'España "ensin memoria económica". Pela so parte, la directora xeneral de Formación Profesional, Desenvolvimientu Curricular ya Innovación Educativa del Principáu, Victorina Fernández, afirmó que n'Asturies tán "trabayando a estazón" nos desenvolvimientos curriculares pero nun lleguen a tiempu. Igualmente, aseguró que la llei tien "serios defectos" técnicos y que ente los centros educativos y les families xeneróse "muncha molición", a lo que se suma que'l financiamientu "nun ta clara" porque la fórmula ufiertada pol Ministeriu, usar el Fondu Social Européu, ye una solución "coyuntural". Per otru llau, Fernández dixo que va solicitar de nuevu a Wert que nel real decretu d'especialidaes del oficiu docente pueda definise como especialidá l'asturianu. "Tenemos la ufierta de la llingua en tola comunidá autónoma y los profesores que lu imparten precisen estabilidá", comentó. Fonte: Asturnews