26/9/14

Principia La Vagamar con un actu n'alcordanza del xesuíta asturianista González-Fierro Botas

Cartelu de la IX La Vagamar

    L’Asociación Cultural L’Arribada da aniciu esti vienres a la novena edición de La Vagamar con un actu d’homenaxe al xesuita asturianista Federico González-Fierro Botas. Les actividaes, que continúen mañana cola entrega de los premios Timón, van allargase hasta'l mes d'avientu.
   El patiu del xixonés Centru de Cultura Antiguu Institutu va acoyer esti primer eventu de La Vagamar col que L’Arribada quier reconocer el llabor de González-Fierro Botas, asina como del Coleutivu Manuel Fernández de Castro –del que foi fundador– “pola normalización llingüística ente la comunidá cristiana asturiana”. Nacíu n’Uviéu nel 1942, cursó los sos estudios nel Institutu de Bachilleratu Alfonso II, diplomóse en Llingües Clásiques (Llatín y Griegu) y doctoróse en Teoloxía y en Ciencies Polítiques y Socioloxía cola tesis doctoral titulada ‘La formación sindical impartida por Centrales representativas en España, 1976-1992’. Llicencióse tamién n’Historia, siendo profesor d’Historia Social, y foi espertu en llingua y lliteratura ruses y profesor visitante en delles universidaes de l’antigua Xunión Soviética y de l’actual Federación Rusa. Nesi país precisamente finó a los 59 años d’edá por mor d’un accidente de tráficu asocedíu nel 2002.
   Enantes, foi un cura obreru que vivió en Catalunya, Galicia y otres partes d’Europa, hasta acabar destináu na Fundación Revillaxixéu, onde foi xefe d’estudios, consiguiendo inxertar nel currículu del centru educativu la Llingua y Cultura Asturiana. Presidió tamién dende 1988 y hasta la so muerte’l Coleutivu Manuel Fernández de Castro, qu’axunta a sacerdotes favorables a la normalización de la llingua asturiana. Esta organización ye la responsable de la torna al nuesu idioma de la Lliturxa Católica y otres obres del mesmu calter, asina como del Evanxeliu de San Lluques, nes que participó González-Fierro Botas de manera mui activa, ente otres iniciatives.
   Esta tarde, a partir de les 19.30 hores, va tener llugar esti actu d’alcordanza que va presentar Humberto Gonzali, coordinador de L’Arribada. La primer actuación va protagonizala la Coral Asturiana de Gijón, pa depués siguir con delles intervenciones sobre la vida y obra de González-Fierro Botas a cargu de Carlos Rubiera, conceyal de Cultura, Educación, Mocedá y Fiestes; Xosé Nel Riesgo, direutor de la Fundación Municipal de Cultura, Educación y Universidá Popular; Xosé Ramón Iglesias Cueva, representante de l'Academia de la Llingua (ALLA); Ramón d'Andrés, filólogu y miembru del equipu de traductores y espertos de la Biblia n'asturianu; Pablo González-Fierro Huerta, sobrín del homenaxáu; y Xuan Pandiella, presidente de l'Asociación de Vecinos San Emiliano de Vega.
Tres una llectura poética n’asturianu y rusu a cargu d’Aurora García Rivas, D’Andrés, Xosé Bolado, Xuan Xosé Sánchez Vicente, Gonzali y Marina Mikayelyan, con acompañamientu musical de Dani García de la Cuesta, va facese una alcordanza de dos llibros qu'espeyen la faceta de traductor de Fierro Botas: ‘Antoloxía Poética Asturiana’ y ‘Poesíes Llíriques d'Aleksandr Pushkin’. L'actu terminará cola segunda parte de l'actuación de la Coral Asturiana de Gijón.
Premios Timón y otres actividaes
   Mañana va continuar la programación de La Vagamar cola entrega de los premios Timón, nel mesmu llugar y a la mesma hora. Esti añu los gallardonaos son l’escritor y miembru de l’ALLA, Xosé Bolado (VIII Premiu Timón p'autores n'asturianu y eonaviego); la escritora y cronista oficial d'Uviéu, Carmen Ruíz-Tilve (V Premio Timón p'autores asturianos en castellanu); y la Xunta pola Defensa de la Llingua Asturiana (II Premiu Timón de Cultura Asturiana). L'actor Alberto Rodríguez va conducir l’actu, nel que va actuar el grupu Taranus.
   L’actividá de La Vagamar nun fina esta fin de selmana, yá que tán previstos actos hasta’l mes d’avientu. De momento, ta programáu pa ochobre’l ciclu ‘Asturies y les sos lliteratures’, con sede na sala de conferencies del Antiguu Institutu. José Luis Valladares va abrir esta estaya’l llunes día 6, a les 20 hores, cola presentación del llibru ‘La casta política, sus abusos y complicidades’, qu'axunta artículos sobre la política española de los últimos años, espublizaos nel so momentu en diversos diarios dixitales y na prensa asturiana. El martes 7, a les 19:30, ye'l turnu de ‘Les manes enceses’, una antoloxía d'Eugénio d'Andrade con poemes traducíos a la nuesa llingua por Antón García, mentes que’l miércoles 8, a les 19:30, va protagonizar la xornada ‘Contra'l silenciu’, esbilla y compilación de Berto García de poemes pertenecientes a la cuasi totalidá de los poetes del Surdimientu. Zarra esti ciclu’l xueves 9, a les 20 hores, Pilar Sánchez Vicente cola presentación de la so novela más recién, ‘Luciérnagas en la memoria’.
   Pa payares y avientu, L’Arribada anuncia tertulies, proyeiciones cinematográfiques y más actos lliterarios, tovía por confirmar. Como gran ausencia d’esta edición ta la tradicional arribada d’escritores a El Muelle, que nun se celebra por motivos presupuestarios.      Fonte: Asturies.com

1 comentario:

  1. Na IX edición de La Vagamar, llarga vida a Fierro Botas na so alcoldanza asturianista.

    ResponderEliminar

Los comentarios tán pendientes de moderación. Espublizaránse lo primero dable.