El Conceyu de Mieres comprométese con Iniciativa pol Asturianu a incluyir al asturianu nel concursu lliterariu Eugenio Carbajal

Iniciativa pol Asturianu felicita pola decisión pero recuerda qu’entá queda muncho por facer en Mieres El Conceyu de Mieres vieno acabante contestar al pidimientu d'Iniciativa pol Asturianu pa que se comprometiera a incluyir al asturianu nel concursu lliterariu Eugenio Carbajal. Iniciativa pol Asturianu unviaba va unes selmanes una reclamación al Conceyu de Mieres dempués de recibir una quexa porque esti nun permite l'usu del asturianu nun concursu lliterariu y díes dempués d’unviar la quexa la conceyala de Consumu, Xuventú ya Infancia poníase en contactu cola organización pa esplicar la so disposición a facer los cambeos necesarios pa que l’asturianu nun seya marxináu nesti concursu. El Conceyu de Mieres convoca dende va años el concursu de Rellatos Cortos Eugenio Carbajal al traviés de la Conceyalía de Xuventú, pa mozos d'ente 18 y 30 años y específica nes sos bases que los rellatos “namás van poder presentase en castellán”. Los representantes d’Iniciativa pol Asturianu desplicaron a la conceyala que con estes bases taben “marxinando dafechu la llingua asturiana nun ámbitu tan importante como'l lliterariu, y nesti casu tamién el xuvenil, onde l'asturianu tien un importante puxu y onde la normalización del idioma ye bien importante”. Iniciativa pol Asturianu, nuna nota de prensa asoleyada esti día, manifesta so "felicitación pola promesa d’esti cambéu, que tovía tamos esperando a ver sobre’l papel, pero ficimos saber tamién a la conceyala la necesidá de tomar munches más midíes, pues el Conceyu de Mieres tien entá muncho que facer nel ámbitu de la normalización. Esti nun ye más qu’un primer xestu, qu’esperamos que pueda ponese en marcha nesta mesma convocatoria, cola inclusión d’una categoría pal asturianu dientro el concursu, xunto a otres midíes que yá-y propunxo Iniciativa pol Asturianu de cara a la visibilización y normalización del asturianu". Fonte: Asturnews