El Plenu del Conceyu d'Uviéu da lluz verde al usu de la llingua asturiana nel tresporte públicu

Plenu del Conceyu d'Uviéu

   Con 21 votos a favor, 4 astenciones de los ediles de Foro y un únicu votu en contra, el Plenu del Conceyu d’Uviéu aprobó l’usu del asturianu na TUA, la empresa pública de tresporte urbanu. La selmana pasada yá recibiera’l vistu bonu de la Comisión d’Economía ya Interior.

   Roberto Sánchez Ramos ‘Rivi’ encargóse de defender la propuesta presentada ayeri pol so partíu, Izquierda Xunida, tres la reclamación “realizada por sectores sociales en defensa del asturiano, nuestra lengua”, en rellación a la quexa presentada a finales d’agostu por Iniciativa pol Asturianu y presentada a tolos grupos municipales uviedinos. Tres les pallabres del edil, intervino Pedro Manuel Fernández Ruiz, conceyal non adscritu tres la so salida de Foro, que defendió la llingua asturiana como patrimoniu cultural, pero non como instrumentu de comunicación. D’igual forma, apuntó que nun esiste demanda ente la población pal usu del asturianu nos Tresportes Uníos d’Asturies (TUA), empresa pública que xestiona los autobuses urbanos, y afirmó que, “por mucho que nos duela, podemos comprobar todos los días que la llingua asturiana no termina de cuajar dentro de nuestra comunidad”. Por último, señaló que la midida d’introducir “el bable en el transporte público no hará más que complicar la vida a los ciudadanos de Oviedo”.

   Juan Pérez Zaldival, en nome de Foro, esplicó l’astención del so partíu señalando qu’entiende que’l llugar pa tratar l’asuntu yera la Comisión de Cultura, non la d’Economía, y añadió que “Foro dice sí a la llingua como patrimonio cultural de Asturias y al desarrollo de la Ley que la regula, pero en esta propuesta nuestro grupo municipal va a abstenerse porque nosotros no estamos aquí para hacer el coro a nadie, ya que tenemos por costumbre estudiar las propuestas de calado a fondo y decidir sobre ellas en nuestro partido, sin improvisar posiciones”, en referencia a que la d’IX al respeuto foi presentada “de manera urgente sin que ésta se justifique suficientemente”. Nesi sen, el voceru del PP, Gerardo Antuña, defendió que se tratará na Comisión d’Economía por ser una infraestructura pa los TUA.

Agora'l tresporte urbanu n'Uviéu, n'asturianu

   Pa zarrar, tomó la palabra otra vuelta ‘Rivi’ pa tratar de convencer a Foro pa que siguiese’l mesmu camín que n’otros conceyos na “divulgación del asturiano”. “No es una tragedia y se incorpora algo que debíamos haber hecho hace muchísimos años: la divulgación, con carácter cultural, del asturiano en las líneas de autobuses”, finó.                    Fonte. Asturies.com