El Conceyu de Castrillón vieno acabante de poner en funcionamientu nesti añu 2014 el Serviciu de Normalización Llingüística, un serviciu públicu a disposición de tola ciudadanía que tien por oxetu promover y facilitar l’usu del asturianu na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa sofitar el fomentu y la difusión de la llingua asturiana en tolos ámbitos de la vida municipal, col enfotu d’enanchar la so presencia na vida social y cultural del conceyu.
Esti Serviciu, estrenáu’l pasáu 4 de payares de 2013 y que llevaba peslláu dende xineru d’esti añu, ponse de nuevo en marcha’l pasáu 22 de setiembre de 2014 col envís d’executar el Proyectu de Normalización Llingüística del Ayuntamientu de Castrillón 2014, aprobáu por Resolución d’Alcadía’l 23 de julio del 2014, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2014, arriendes de la traducción de la páxina web del Centru Cultural Valey.
Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008.
La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu lletrónicu: llingua@ayto-castrillon.es, o per teléfonu: 985530329.
Fonte: Asturnews
| |
Pasín a pasín faése'l camín.
ResponderEliminarHai que dar munchos más pasos y más llargos, si queremos que la nuesa llingua se caltenga alitando per más sieglos qu'esti.
ResponderEliminarPos sí que ye bien cierto, pero Inaciu, esti asuntu ye trabayu de munchos, munchos, de muncha xente interesada na oficialidá y l'asturianu y non de dalgunos pocos namás.
ResponderEliminarHai que falen en forma y que practiquen la so propia "política llingüística" dende la butaca del salón de la so casa o dende'l chigre alredor d¡un bon pinchu y sidrina. Hai qu'arrimar el costazu acaldía na cai, nel llugar de trabayu, nos medios, etc. Trabayar y significase más pola lllingua y falar menos tres la barrera.
ResponderEliminarPaez ser que la xente ama y quier (internamente) l'asturianu como la so llingua materna pero nun tán dispuestos a lluchar y defendela con fechos. Polo que l'asturianu paez que va de capa cayida y de ende la negativa de los partíos políticos y del gobiernu asturianu a consentir la so oficialidá. Ye una teoría.
ResponderEliminarYe'l signu de loso tiempos que nos toquen vivir. Son munchos y munches los que quieren la oficialidá. Pero que lo trabayen y faigan los sacrificios correspondientes OTROS, los demás. Asina nos lluz el pelo, collacios y collacias.
ResponderEliminar