L'ataque "malintencionáu" al enseñu d'asturianu moviliza a l'ALLA, sindicatos y coleutivos sociales

 

Movilización  social  pol  asturianu

   “Nun vamos permitir que la Llingua Asturiana compita con una segunda llingua estranxera”, afirmó Ana Cano na presentación d’un manifiestu conxuntu de l’ALLA con sindicatos y coleutivos sociales. Piden que se cumpla'l marcu llegal actual.

   “Vamos movilizar tolo que podamos pa qu’eso nun seya asina”, continuó la presidenta de la institución académica, qu’anunció una denuncia énte la Xunta Xeneral, entrevistes con tolos partíos políticos y l’entamu de too tipo de movilizaciones sociales, amás de treslladar énte organismos internacionales “l’atropellu que se quier facer cola Llingua Asturiana”, como pue ser l’Asociación pa la Defensa de les Llingües y Cultures Europees Amenazaes (ALCEM) o’l Conseyu d’Europa “por incumplimientu de la Carta Europea de les Llingües Rexonales o Minoritaries por parte del Gobiernu autonómicu si esa propuesta se lleva alantre”, ensin escaecer la posibilidá de llevar l’asuntu al Conseyu Escolar del Estáu y el Conseyu Escolar del Principáu d’Asturies. Esta posición defendida pola Academia de la Llingua Asturiana (ALLA) tien el sofitu de los sindicatos educativos SUATEA, CC OO y FETE-UXT, de les organizaciones de pas y mas d’alumnos como la FAPA Miguel Virgós y FAPAS Xixón, la Xunta Estudiantil Asturiana, el Sindicatu d’Estudiantes, la Xunta pola Defensa de la Llingua Asturiana, Iniciativa pol Asturianu, ‘Reciella. Families pol Asturianu”, la Tertulia Cultural El Garrapiellu y Ástura.

   Toes estes organizaciones roblaron un manifiestu de nome ‘La LOMCE, el currículu d’Asturies y la enseñanza de la Llingua Asturiana’ tres l’ataque aniciáu pol PP por unes quexes supuestes d’un grupu de padres pola obligación d’escoyer ente esta materia y Cultura Asturiana –que s’impartiría en castellanu–, aumentaes de manera descomanada por un diariu asturianu. Nel testu falen de “una nueva oportunidad perdida” poles posibilidaes qu’ufría al idioma la nomada ‘Llei Wert’ que la Conseyería d’Educación, Cultura y Deporte nun aprovecha en Primaria: “La llingua sigue calteniendo una dedicación horaria difícilmente defendible dende’l puntu de vista pedagóxicvu (1,5 hores a la selmana); nun hai previsión del so emplegu pa trabayar conteníos rellacionaos con aspeutos históricos, culturales, medioambientales, xeográficos, artísticos…, de la comunidá autónoma; pierde, en fin, el so calter de voluntariedá pa tresformase nuna materia optativa que compite cola Cultura Asturiana, bloque de conocimientos que poles sos carauterístiques habría ser tresversal en tol currículu asturianu”. Nesti puntu, Xosé Antón González Riaño, responsable de la estaya d’Educación de l’ALLA, señaló que la situación afayadiza pal idioma seríen dos hores selmanales y el so usu como llingua vehicular pa Ciencies Sociales y Naturales.

   “La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturina/Llingua Estranxera ye namá una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana”, continúa’l testu en referencia a la propuesta del PP, refugada dafechu pola conseyera Ana González. Amás, demanden el cumplimientu del marcu llegal de referencia actual, esto ye, “LOMCE y Llei d’Usu”.

La oficialidá como solución a toos estos problemes

    La llectura del manifiestu dio pasu a un llargu alderique nel que tomaron la pallabra dellos de los representantes de los coleutivos firmantes. Asina, Maximina Fernández Otero, secretaria xeneral de FETE-UXT, llamentó “l’ataque que ta sufriendo la llingua nestos díes” y afirmó “que nun vamos permitir esa competitividá que pretenden énte la Llingua Asturiana y otra segunda llingua estranxeru u otra materia. Paeznos tovía poco la hora y media que s’establez pa la materia, yá que l’asturianu debería ser llingua vehicular pa estudiar los conteníos d’otres materies como Ciencies Sociales o Naturales”. Por último, criticó la postura del PP énte una normativa d’una llei, la LOMCE, “qu’ellos mesmos impusieron”.

   María Elena González, presidenta de la FAPA Miguel Virgós, ratificó que “nun recibimos nengún tipu de suxerencia nin quexa” pola ufierta de Llingua Asturiana como materia de llibre configuración cola alternativa única de Cultura Asturiana. “La mayoría de les families, na educación pública, quieren continuar estudiando esta llingua y que sía la llingua vehicular de los sos fíos”, aseguró pa depués afirmar que la supuesta alarma social de la que se ta falando estos díes “ta orientada políticamente”. Pela so parte, Faustino Zapico, de SUATEA, recordó que “Asturies ta ausente nel currículu” cola entrada de la LOMCE y pronosticó una situación peor en Secundaria pa la Llingua Asturiana, mentes qu’Enrique Fernández, secretariu xeneral de la Federación d’Enseñanza de CC OO, apuntó que too taría solucionao si l’idioma fora oficial, un pasu pal que namái fai falta “voluntá política”.

   Tamién faló Inaciu Galán, presidente d’Iniciativa pol Asturianu, que criticó que s’hinchen les quexes “d’una minoría”, y Ánxel Nava, de la Tertulia Cultural El Garrapiellu, que recordó que l’asturianu “ye patrimoniu cultural inmaterial” del país y que la educación ye necesaria pa frenar una desaniciu que, de nun camudar les coses, llegará “en dos xeneraciones”.             Fonte: Asturies.com