La XDLA va ceder un espaciu de la carpa del XXVI Conciertu pola Oficialidá a les editoriales asturianes

    Una pequeña feria del llibru va ser la novedá principal del XXVI Conciertu pola Oficialidá que va celebrase esti sábadu en Xixón. La imposibilidá de repetir nel Parque Inglés lleva a la XDLA a treslladar l’eventu a El Natahoyo.

   Toles editoriales qu’espublicen n’asturianu van tar presentes nesti espaciu que va acutar la Xunta pola Defensa de la Llingua Asturiana (XDLA) nuna parte de la carpa cola intención de “dar visibilidá al llibru asturianu”, señala Carlos Pulgar, voceru de la organización cívica. Asina, de 19 a 22 hores, de manera aproximada, y aprovechando’l momentu más sele y familiar de la cita, coles actuaciones de Pop Piquiñín y Tuenda, los visitantes van poder acceder a les novedaes últimes y obres más populares d’editoriales asturianes como Seronda, VTP, Trabe, AsturtOOns o Pintar-Pintar, ente otres. Yá de nueche, esi espaciu va ser aprovecháu pola organización pa servir una cena a los músicos que, como ye vezu, participen de manera desinteresada na cita.

   La otra novedá d’esta edición del Conciertu pola Oficialidá ye’l llugar de celebración. Xixón repite como sede, pero les obres del pozu de tormentes que va construyise nel Parque de los Hermanos Castro –conocíu de manera popular como’l Parque Inglés– obligó a la XDLA hai dos meses a buscar otra ubicación. Al final la escoyida ye la esplanada frente al Acuariu de la playa d’El Natahoyo, llugar onde se celebren los conciertos de la Selmana Grande xixonesa. “Ye un espaciu mui guapu”, comenta Pulgar, qu’espera un bon soníu pola disposición del llugar.

   El cartelu d’esti añu ta compuestu por Pop Piquiñín, Tuenda, Asgayah Sound, Xera, La Tarrancha (y collacios), Misiva y Skama la Rede, tando previsto l’aniciu del conciertu pa les 19.30 hores. Les entraes a la venta de manera anticipada yá tán disponibles, a un preciu de 8 euros, en L'Esperteyu Chigre Folk y Cervecería Malá Strana (Uviéu); Café Trisquel y Sidrería Canteli (Xixón); El Cafetón (Avilés); Pub Creisi (Candás); La Palmera (La Pola Ḷḷena); Abre César (La Pola Siero); L'Abellugu (Mieres); Librería Las Dos Vías (Grau); La Traviesa (L'Infiestu); Sidrería Los Pegollos (Arenas); CSA La Semiente (L'Entregu); y Bar Azul (Cangas del Narcea). Mentes, na puerta, van tener un coste de 10 euros.
Fonte: Asturies.com