Damián Barreiro presentól so llibru "L'Espeyu onde miranos" ayeri en Corvera
El periodista Damian Barreiro presenta esti miércoles 11 de xunu nel Centru Sociocultural de Les Vegues (Corvera) el so llibru "L'Espeyu onde miranos". Barreiro ye periodista. Tres de ser redactor demientres años del selmanariu Les Noticies y n’Asturies.com, amás de presentador en dellos programes de TLG, la tele local de Xixón, collabora nel periódicu Diagonal Asturies, na sección «Escolinos» del diariu La Nueva España y n’otros medios asturianos.
L’espeyu onde miranos. Televisiones de proximidá n’Europa Occidental y procesos de recuperación identitaria, obra cola que Damián Barreiro Maceiras ganó’l Premiu «Fierro Botas» 2013 que convoca l’Ayuntamientu de Xixón, ye un ensayu de la importancia que los medios de comunicación, en xeneral y la televisión en particular, tienen sobre’l caltenimientu y pervivencia d’una llingua y, más p’allá, de la creación o recuperación de la identidá específica de los pueblos a los que representen y nos que se desenvuelven.
Afitando’l conceptu de televisión de proximidá como daqué que ta definíu non pol ámbitu de cobertura, sinón polos conteníos, pol accesu de la comunidá al mediu, pol predominiu de la producción propia y pola promoción de los intereses locales, l’autor fai un percorríu peles televisiones de proximidá, o autonómiques, más cercanes a Asturies, tanto d’Europa como del Estáu español, onde analiza l’usu que nelles se fai de les llingües propies y el papel qu’estos medios tuvieron na normalización y estandarización d’esos idiomes. Tres d’esti análisis de los medios de la redolada, l’ensayu céntrase na situación y papel de la RTPA (Radiotelevisión del Principáu d’Asturies) nos nueve años d’esistencia y más en concreto de la TPA. Fonte: Infoasturies.net
Perbón escritor pero con cara pena.
ResponderEliminar