Los escritores de lliteratura infantil aporten a Corvera pa compartir esperiencies colos llectores

 

Escritores y llectores de lliteratura infantil en Corvera

   Un añu más, cola llegada del calor y de les vacaciones, Corvera entama’l ‘Veranu Lliterariu’. Esta actividá tien como oxetivu promocionar la llectura n'asturianu ente neños y neñes con alcuentros colos escritores de les sos histories favorites.

   Asina, dalgunos de los autores más renomaos de la lliteratura n’infantil n’asturianu van pasar una hora colos sos pequeños llectores, tiempu nel que van falar de les sos creaciones y histories, amás d’intercambiar impresiones y idees. Una esperiencia mui prestosa peles dos partes que busca promover la llectura ente los neños y neñes. L’actividá va celebrase los llunes de xunetu y agostu, de 11.30 a 12.30 hores, na Biblioteca de Les Vegues y la so asistencia ye de baldre.

   Nesta tercer edición, la Casa de la Llingua-Serviciu de Normalización Llingüística de Corvera convidó a escritores que nun participaren nos años anteriores, a esceición de Xurde Fernández y Berto García, cola intención de “mostrar la diversidá y pluralidá de la lliteratura infantil n’asturianu”. Carla Perucho va encargase d’abrir el ‘Veranu Lliterariu’ del 2014 el día 7 de xunetu, pa depués continuar con Xuan Carlos Crespo Lanchas (14 de xunetu), María Xesús Guillón (21 de xunetu), Esther García (28 de xunetu), Xurde Fernández (4 d’agostu), Berto García (11 d’agostu), Marisa López Diz (18 d’agostu) y Alberto Menéndez (25 d’agostu).                                                                                                Fonte: Asturies.com