Esposición en Realidá Enanchada sobre'l cómic n'asturianu
El xueves inauguróse la esposición "Traducción y cómic n’asturianu en Realidá Enanchada", que va tar abierta al públicu nel CEPA del Nalón hasta’l 27 de xunu. Pa disfrutala ye necesario contar cola aplicación Layar nel móvil.
“La realidá enanchada ye'l términu que s'usa pa definir una visión per mediu d'un dispositivu tecnolóxicu, nesti casu cualesquier dispositivu móvil, en concretu cola aplicación Layar, qu'añade información virtual a la información física yá esistente; esto ye, enancha una parte física cola virtual”, esplica Xuan Santori, profesor y coordinador d’esta muestra que naz del trabayu de los alumnos y alumnes de Llingua y Lliteratura Asturiana del Centru d’Educación de Persones Adultes (CEPA) del Nalón con motivu de la Selmana de les Lletres Asturianes. Nella, el visitante va atopar material espositivu en formatu físicu sobre’l cómicu n’asturianu que pue ampliar con archivos d’imaxes, videos, documentación de blogues y páxines web que s’activen al ser escaniaos cola aplicación Layar.
La inauguración de la muestra celebróse na tarde d’ayeri, confirmándose como una actividá “perestimulante” que causó “daqué plasmu ente los alumnos polos recursos que remana la presentación en realidá enanchada”. La esposición va tar a disposición de los alumnos del centru asitiáu en Sotrondio y del públicu en xeneral hasta’l 27 de xunu. Fonte: Asturies.com
Ye una guapa esposición bien digna de ser visitada, ye un pasín más camín de la oficialidá de la llingua, p'alantre.
ResponderEliminar