Movilla niega l'usu d'un llocal municipal a un coleutivu de paraos por solicitalo n'asturianu

     L’alcalde socialista de Noreña, César Movilla, torna a protagonizar una falta de respetu a la ciudadanía por mor de la so llingua. Nesta ocasión niega l’usu d’un llocal municipal a un coleutivu de paraos por solicitalo n’asturianu.

    “En relación a su escrito de fecha 13/12/13, deberá ser redactado en castellano, lengua oficial de esta Comunidad Autónoma”  foi la contestación breve del alcalde nuna carta remitida a Mariu Arbesú, representante del Coleutivu de Paraos/es y Precarios/es Siero-Noreña, firmada por Movilla con fecha del 26 d’avientu. Esta asociación de formación nueva pretendía solicitar l’usu d’un llocal municipal p’aconceyar tolos miércoles en Noreña, recibiendo la refuga d’esti políticu de la FSA-PSOE. “Pensábemos que quiciabes nun tendríamos un sofitu abondu de les instituciones públiques, pero lo que nun esperábamos yera atopanos con un portazu na cara de buenes a primeres.

La solicitú

    Ye un insultu a tolos paraos y paraes de los conceyos de Siero y Noreña nun atender los sos pidimientos por una cuestión formal relativa a la llingua que s'use pa presentar una instancia y paeznos una falta de sensibilidá absoluta del alcalde de Noreña escontra los paraos. Un alcalde asina tendría de dimitir darréu y l'oposición tendría d'esixir la so dimisión porque nos demuestra que nun ta al altor de les circunstancies y paez desconocer la realidá social y económico del propiu conceyu que rixe, onde hai más de 500 paraos y un porcentaxe de desemplegu cimeru al 20 por cientu y onde, a éstes,  l'asturianu ye la llingua tradicional, colo cual nun entendemos como puede negase el so usu a los ciudadanos”, espliquen nun comunicáu.

    Esta situación llevó a esti coleutivu a refugar la posibilidá de siguir les instrucciones de Movilla y a celebrar los sos aconceyamientos en Siero, en concreto nel salón d'actos del Llar del Pensionista d'El Berrón, onde mañana va tener llugar la presentación oficial de la organización a les 19 hores. Paraos y emplegaos en trabayos precarios y temporales de la zona deciden dar forma a esti proyeutu “p'analizar y buscar una respuesta coleutiva al problema del paru y la precariedá. A un problema coleutivu tenemos que buscar soluciones colectives”, espliquen al tiempu que recuerden qu’en Noreña hai más de 500 desemplegaos y, en Siero, 5.000. Ente los oxetivos de l’asamblea destaca l’enfotu n’implicar a les instituciones a iguar esti problema, la esixencia de polítiques que frenen la emigración forciada de xente mozo y la puesta en marcha d’esperiencies d’autoemplegu y cooperativismu, ente otros asuntos.

Iniciativa pol Asturianu pide la so dimisión.
     Tres conocer la postura del alcalde de Noreña, reincidente n’ataques a la llingua asturiana dende la so posición na Casa Conceyu, Iniciativa pol Asturianu reclamó la so dimisión. “Yá intentó prohibir  l'usu del asturianu n'otros ámbitos, como'l Plenu del Conceyu de  Noreña”, polo qu’esixe a la FSA-PSOE que tome midíes “contra esti alcalde antidemocráticu que reprime a  ciudadanos por querer usar la so llingua propia, tal y como recueye  como drechu la Llei d'Usu del Asturianu, vixente dende 1998”. Respeuto al fechu en concretu que denuncia’l Coleutivu de Paraos/es y Precarios/es Siero-Noreña, señala que “ye un ataque a la dignidá y la igualdá de los  ciudadanos asturianos que deciden en llibertá espresase na so llingua propia”, amás d’una aición que va “contra la llexislación vixente”.     Fonte:  Asturies.com.