Suburbia Ediciones abre l'añu con dos títulos nuevos nel so catálogu. Asina, asoleya 'Tendal', poemariu de Berto García, y reedita la novela xuvenil 'Misión Pelayo', de Xulio Arbesú, espublizada nel 2002 pola Academia de la Llingua Asturiana.
‘Tendal’ trátase de la primer collaboración ente García y Suburbia, y recueye venti poemes escritos pol autor de Les Vegues ente abril y agostu del 2006 “que taben guardaos en caxones, o nes perches de dalgún armariu, y qu’agora cuelguen nesti Tendal, pa depués goler a llimpio, bien prestoso, planchadinos y curiosos”, esplica. El poemariu, que suma’l númberu 12 de la coleición ‘males tierres’, “esplora con téunica ya maestría la cotidaneidá dende'l domíniu de la llingua y les metáforas”, añaden dende la editorial. El llibru ta a la venta a un preciu de 10 euros.
La segunda novedá que presenta Suburbia ye la reedición de la novela xuvenil d’Arbesú ‘Misión Pelayo’, escosada nel 2002 al poco de salir espublizada. Agora “ve la lluz de nuevo nesta edición correxida ya actualizada pol so autor pa que los llectores d'anguaño puedan desfrutar de les aventures de Mario, Licia y Rafa. Viaxes nel tiempu, viaxes iniciáticos y acontecimientos que marcaron la hestoria d'Asturies nestes páxines que caltienen la maxia ya l'encantu orixinal”, apunten dende la editorial sobre esta obra clave de la lliteratura xuvenil n’asturianu. Nesta reedición, a la venta a un preciu de 12 euros, rescátense les ilustraciones orixinales de Berto Álvarez Peña. Fonte,
Asturies.com
Asturies.com
| Adxuntu | Tamañu |
|---|---|
| Cubierta de 'Misión Pelayo', de Xulio Arbesú.jpg | 233.61 KB |
Bona ya interesante llabor.
ResponderEliminar