La Fundación Gustavo Bueno, arrodiada poles irregularidaes na xestión de sovenciones

                                                                Sede de la FundaciónLa Fundación Gustavo Bueno tendría que devolver al Ayuntamientu d'Uviéu 172.324 euros más intereses, por una axudicación a deu pa familiares.

  L'Ayuntamientu d'Uviéu vien de conocer un informe de fiscalización desendolcáu por Intervención, y pol que s'encamienta que la Fundación Gustavo Bueno tenga que devolver a les arques conceyiles 172.234 euros más intereses. El motivu, les numberoses irregularidaes detectaes na xestión de los 800.000 euros de sovención apurríos pol Ayuntamientu pa la esposición "Oviedo XII Siglos", desendolcada a lo llargo del añu 2008. Nesi sen, la Fundación ye bien conocía poles xeneroses aportaciones económiques facilitaes pol Ayuntamientu d'Uviéu -y otres instituciones públiques- pa les sos actividaes.

   La Intervención considera qu'hebo "responsabilidá contable" de la Fundación Gustavo Bueno na xestión de dicha sovención, debío l'alxudicación a deu de trabayos de subcontratación a la empresa "Ingeniaqed", que como foi conocío posteriormente, ta controlada pola hermana y la fía de los dos patronos de la entidá. El contratu algamó un valor de 540.000 euros, alcontrándose actuaciones como un "gastu de personal" de más de 170.000 euros pa una única persona contratada.

   Poro, la Fundación incumplió, como mínimo, la obligación de pidir 3 ufiertes enantes d'axudicar los trabayos a una empresa, cuestión que nun se dio énte un evidente enchufismu na actuación de la entidá qu'algama'l nome del polémicu -y belixerante pa cola cultura asturiana y el movimientu nacionalista- filósofu. Sicasí, nun ye la primer vegada que la Fundación Gustavo Bueno atópase nel puntu mira mediáticu, pola so escura xestión de fondos públicos.       Fonte.  Infoasturies.