L'añu nuevu va trayer la posibilidá de tener Android en llingua asturiana

    Softastur ta acabante de confirmar el vistu bonu de Google pa desendolcar Android, sistema operativu basáu en Linux utilizáu en móviles y tabletes, n’asturianu. Yera’l pasu definitu pa rematar un trabayu entamáu hai más d’un añu.

D’esta forma, la mayoría de los usuarios asturianos qu’utilicen móviles qu’empleguen esta plataforma van poder disfutar del so aparatu na llingua propia, dao que la versión de Softastur ye compatible con más de 80 modelos del mercáu. Pa ello han de siguir unos pasos qu’esti coleutivu d’usuarios va anunciar nel momentu nel que l’Android en llingua asturiana tea fináu dafechu.

   Otra manera, Softastur punxo en marcha esti mes una ferramienta en llinia nueva que recueye la topinimia oficial del país. “La páxina ufre visualización per aciu de Google Maps y OpenStreetview, les coordenaes del topónimu consultáu y el códigu del Nomenclátor”, espliquen dende’l coleutivu, qu’añade que la consulta “pue facese por cualquier de los campos –toponimia derogada o toponimia oficial– y emplegando cualquier parte de la cadena del topónimu que se quier consultar”.

 Fonte:  Asturies.com