Romería de la Oficialidá de Bimenes

La Fiesta de la Oficialidá de Bimenes adelanta la fecha y pasa a llamase Romería de la Oficialidá Por Pablo R. Guardado. La fusión de la Romería Asturiana que tenía llugar en mayu en Bimenes cola Fiesta de la Oficialidá da como resultáu la Romería de la Oficialidá. Nesta primer edición va adelantase al 16 de xunu pa nun coincidir col Festival de la Sidra de Nava. Pese a esti cambiu nel formatu tradicional de la Fiesta de la Oficialidá de la Llingua Asturiana, qu’esti añu cumpliría dieciséis ediciones, nun se pierde la esencia d’esta folixa que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997, nin tampoco les actividaes más significatives, como la llectura del pregón, qu’esti añu va correr a cargu de la escritora Ana Vanessa Gutiérrez, o’l concursu de gaiteros y gaiteres mozos. D’esta forma, amás del Conceyu de Bimenes, van participar na organización d’esta fiesta los dos coleutivos qu’entamaben la Romería Asturiana, les asociaciones culturales Los Yerbatos y El Corriellu la Pandorga, y el Palaciu del Marqués de Casa Estrada. Con esti cambiu s’espera que les celebraciones garren más puxu. No que respeuta al cambiu de fecha, trátase de dalgo circunstancia, según señala Daniel Cueli. “La Romería de la Oficialidá va celebrase, al igual que la Fiesta de la Oficialidá, el primer sábadu de xunetu. Nesta ocasión, al ser mui tardíu (el día 7), coincide col Festival de la Sidra de Nava y por eso decidimos adelantalo al 16 de xunu, fecha na que tampoco nun coincide con otres fiestes de parroquies del conceyu”, esplica’l téunicu d’emplegu y desarrollu llocal de Bimenes y responsable de la programación cultural del conceyu yerbatu. Nel prau del Palaciu del Marqués de Casa Estrada El sábadu 16 de xunu, l’actividá en Martimporra va principiar a les 11 hores con un pasucais que va dar pasu, a les 11.30 hores, a la llectura del pregón na Casa Conceyu. Al meudía va celebrase la misa y la procesión, pa depués entamar la puya’l ramu y la Danza de la Oficialidá. Tamién va haber actuaciones de bandes de gaites y de grupos de bailles infantiles. Pa les 14.30 hores ta prevista, nel polideportivu del colexu públicu, la xinta popular, que va consistir nun pinchéu con tortielles, bollos preñaos, costielles y empanaes, ente otres viandes, postre y bébora. El so preciu ye de 15 euros y ye necesario confirmar asistencia nel teléfonu 985.70.01.64 o na propia Casa Conceyu. Yá de tarde, coles fuercies recargaes, yerbatos y visitantes van poder disfrutar del XIII Concursu de Gaiteros y Gaiteres Mozos (16.30 hores) y del Festival Folklóricu (18.30 hores), nel que van participar les bandes de gaites Ciudad de Cangas de Onís, Villa y Condáu de Noreña y Los Yerbatos, amás de los grupos de baille La Flor del Pumar (Nava), La Deva (Xixón), Los Yerbatos (Bimenes) y Asubío (Vigo), y del coriquín tradicional El Corriellu la Pandorga. A les 21 hores ta prevista la llectura d’un Manifiestu pola Oficialidá por parte de neños y neñes y mayores del conceyu, pa zarrar la xornada festiva cola actuación, media hora más tarde, d’Anabel Santiago, David Varela y Javi Álvarez ‘Pitu’, que van tar acompañaos de los escolinos y escolines del cursu de canción asturiana de Bimenes. Fonte: Asturies.com