Trabe asoleya "Pallabres d'un tiempu" de Pablo Rodríguez Alonso.

Llibros Trabe publica «Pallabres d'un tiempu», de Pablo Rodríguez Alonso «Pallabres d'un tiempu», de Pablo Rodríguez Alonso.29-12-2011 La editorial Trabe acaba de asoleyar el poemariu Pallabres d'un tiempu, col que l'escritor Pablo Rodríguez Alonso ganó'l Premiu Nené Losada Rico nel añu 2010. Esti segundu llibru de poemes del autor ye una obra de madurez, de palabra pausada pero inquietante. Abren el poemariu los versos precisos de quien s’enfrenta a la vida adulta consciente de que les pallabres d’esti tiempu son pallabres mayores, lloñe de les rises y l’esfrute de la neñez: pallabres d’un tiempu «fatigáu d’esperances». La desolación de la vida adulta, de la muerte de la madre o del amor como pasáu o como presente desgarrador andulien los versos apotaos y firmes d’esti volume. Pablo Rodríguez Alonso (Xixón, 1979) ye llicenciáu n’Historia pola Universidá d’Uviéu. Como poeta, ganó nel 2005 el premiu de poesía «Teodoro Cuesta» con "La lluz del nordés" (Ediciones Trabe, 2006). Como historiador féxose con dellos premios d’importancia, como’l V Certamen Cultural Jóvenes Artistas 2005 convocáu pol Conceyu de Cáceres col ensayu Idioma, nacionalidá y conflictu y, más de recién, el XII Premiu d’investigación y divulgación «Rosario de Acuña» col trabayu "De totalitarios a «demócrates»" (Zahorí Ediciones, 2011). Fonte: Estaya d'asturianu.