El centru comercial Caudalia de Mieres fai campaña n’asturianu

REDAICIÓN. UVIÉU - Ye la primer campaña de promoción de consumu d’un centru comercial que se fai n’asturianu dafechu. Caudalia, el centru comercial allugáu en Santuyano (Mieres), ta llevando alantre nesta selmana, dende’l 26 de xunu al 1 de xunetu, una promoción col lema Aforra les perres pa les vacaciones; la cesta la compra regálatela Caudalia. Los veceros que s’averen a cualquiera de les tiendes del centru, incluíu l’Eroski, van atopar publicidá de la campaña, toa n’asturianu. Nun stand, tolos visitantes que presenten un tique de compra de más de seis euros van poder ganar cheques regalu de cinco euros pa cambiar nos locales de Caudalia, entraes de cine o cestes de la compra con productos Eroski valoraes en 50 euros. Amás, ente tolos participantes va haber un sortéu d’un fin de selmana nun hotel-spa de cuatro estrelles pa dos persones.


La idea partió de la xerencia del centru comercial. «Facemos normalmente promociones de consumu, pero nunca n’asturianu. Ocurriósenos entós dir faciendo cosines nesta llingua y esta campaña ye una bona manera d’empezar», señala Pilar Suárez, xerente de Caudalia. «Más alantre puen facese más coses. Nesti casu lo que fiximos foi usar esa llingua en tolos materiales de la campaña», esplica. Son cuñes na radio, cheques, folletos informativos y vales. De momentu, anque dalgún veceru pregunta los nomes de los meses, colos que nun tán familiarizaos, la xente cuasi nin se da cuenta de que ta n’asturianu porque los mensaxes tán na llingua que falen normalmente. D’eso se trata nuna campaña n’asturianu, de que l’idioma nun sía un estorbu sinón una ventaya, dalgo familiar y averao qu'espierte simpatíes. Y nesti casu parez que se ta consiguiendo.

Fonte: Les Noticies