Iniciativa pol Asturianu estrena programa de radio en delles emisores

El periodista Samuel Gradín va tar al cargu d’esti programa que va emitise per internet y en delles emisores asturianes. Iniciativa pol Asturianu anunció estos díes que col envís de siguir meyorando la so comunicación y coincidiendo colos seis meses del entamu de la so actividá pon en marcha una un programa radiofónicu mensual que va dar anuncia de les actividaes de la organización. El programa, del que yá puede sentise na rede’l primer capítulu, llámase “Iniciativa pol Asturianu nes ondes” y ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que va durar la emisión va haber tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu. iniciativa pol Asturianu nes ondes va poder sentise n’emisores a lo llargo de tola xeografía d’Asturies. Pel momentu yá se llegó al alcuerdu d’emitir el programa en Radio Sele, Radio Ujo y AllerFM, anque se sigue en conversaciones con otres radios pa entamar coles emisiones tamién con elles, “col envís de llegar al máximu númberu posible d’asturianos”, espliquen dende la organización. Pa los que prefieran sentilu na rede o llevalu nos sos dispositivos, puede descargas tamién na canal d’Ivoox d’Iniciativa pol Asturianu. Nel primer programa, “que tien una estructura distinta por ser l’estrenu”, va ser entrevistáu Inaciu Galán, presidente de la organización, que va facer un repás pelos primeros seis meses d’actividá de la organización, campañes, etc. Darréu podrá sentise a Denis Soria, vocal de dominiu llingüísticu, que falará de los avances fechos nos contactos con organizaciones de Lleón, Zamora o Miranda del Douro. “De los horarios en caúna de les emsiores daráse anuncia na páxina web y los perfiles en redes sociales d’Iniciativa pol Asturianu”, espliquen los coordinadores d’esti nuevu proyectu Fonte: Asturnews