L'ALLA denuncia la inseguridá xurídica y la falta drechos llingüísticos pesia l'Autu del TC

"Namái la oficialidá pue garantizar y homologar los drechos llingüísticos de tolos asturianos"
L'Academia de la Llingua Asturiana ta acabante amosar la so satisfaición énte la solución dada pol Tribunal Constitucional (TC) a la cuestión d’Inconstitucionalidá de la Llei d'Usu plantegada pol Xulgáu de lo Contencioso-Alministrativu númberu 3 d’Uviéu. L’ALLA sorraya nun ye solo que’l TC refugue la inconstitucionalidá sinón qu’amás obliga a l’alministración a acoyer ensin torga dala les comunicaciones que se-y apurran n’asturianu. Sicasí, la insitución diz que nun se pue “cayer na autocomplacencia” yá que “los asturianos carecemos una situación, dafechu “peculiar” nel contestu español, d’inseguridá xurídica que nun afeuta, por ciertu, a los ciudadanos gallegos, vascos, navarros, catalanes, araneses, valencianos o baleares”.

L'Academia califica de “llamentable” que tengan que ser persones individuales o coleutivos ciudadanos los que, “de contino, esixan l’exerciciu de drechos llingüísticos qu’afiten la Constitución Española y los trataos internacionales a los qu’España se venceya” y recuerda que “a la escontra de lo que dalgunos quieren facer ver nun implica nenguna clas d’oficialidá”, l'Autu del TC “namái afita como dafechu válidos los usos llingüísticos de los asturianos y asturianes colos muérganos dependientes del Principáu d’Asturies, acordies cola llegalidá vixente”. Queden fuera los usos del asturianu n’otros ámbitos tan importantes como los de los conceyos o les delegaciones de l’alministración central asitiaes n’Asturies.

L’ALLA llaméntase de que “los drechos llingüísticos de los asturianos tienen enforma menos grau de reconocencia que los del restu de ciudadanos de les otres comunidaes del Estáu con llingua propia en contestos tan emblemáticos como l’educativu, el de l’alministración de xusticia, la xestión ciudadana, la vida universitaria, etc.”. La situación llingüística asturiana ye pa la insititución de “inseguridá xurídica" y de "curtia reconocencia de derechos llingüísticos”. "La realidá amuesa testonamente una vuelta y otra que namái la oficialidá pue garantizar y homologar los drechos llingüísticos de tolos asturianos de mou que dexemos, d’una vegada yá, de ser ciudadanos de segunda nel marcu de la Constitución Española qu’a toos debería abellugar per igual” diz l'ALLA.

L’Academia fai un llamáu a les fuercies con representación na Xunta Xeneral “pa que tomen determín nesti sen, de mou que’l marcu xurídicu del asturianu algame una solución, firme y estable, d’oficialidá afayada a les necesidaes sociollingüístiques d’Asturies; y reitera la ufierta fecha nel so momentu pa collaborar con tolos axentes sociales nel llogru del citáu marcu xurídicu”.

Fonte: Infoasturies