XV Certame de Poesía y Dibuxu "Diversidá Biolóxica d’Asturies"

La Conseyería d'Educación y Ciencia yá tien colgaes les bases del XV Certame de Poesía y Dibuxu pal alumnáu de toles estayes, que se convoca con motivu de la Selmana de les Lletres. Coincidiendo col añu Internacional de la Diversidá Biolóxica los poemes y dibuxos presentaos han tar venceyaos a esta temática.
Los alumnos y alumnes seleccionaos participarán nun actu que tendrá llugar el día 6 de mayu na Casa la Cultura de Mieres del Camín. La entrega de premios ta organizada pola Conseyería d'Educación en comuña col C.P. Aniceto Sela de Mieres del Camín, llugar nel que se celebrará l'homenaxe escolar al Día de les Lletres Asturianes.
Nel concursu pue participar tol alumnáu d'Educación Infantil, Primaria, Secundaria y Bachilleratu que curse l'asgnatura d'asturianu o gallego-asturianu.

Bases

XV CERTAME DE POESÍA Y DIBUXU
XXXI Selmana de les Lletres Asturianes
Con motivu de la celebración de la “XXXI Selmana de les Lletres Asturianes”, nel mes de mayu de 2010, la Conseyería d’Educación y Ciencia del Principáu d’Asturies convoca’l XV CERTAME DE POESÍA Y DIBUXU pa escolinos y escolines d’Educación Infantil y Primaria y alumnos y alumnes d’Educación Secundaria y Bachilleratu con arreglu a les bases que tán darréu.
BASES
PRIMERA.- Pue participar tol alumnáu d’asturianu y de gallego-asturianu dende 4 y 5 años d’Educación Infantil a 2u Cursu de Bachilleratu.
SEGUNDA.- Los escolinos y escolines d’Educación Infantil de 4 y 5 años y 1er Ciclu de Primaria, han participar con un dibuxu inspiráu na “Diversidá Biolóxica d’Asturies”, coincidiendo col “Añu Internacional de la Diversidá Biolóxica”. Los otros ciclos han participar con poesíes escrites n’asturianu o en gallego-asturianu y ser inédites.
TERCERA.- La temática de los poemes ha tar averada a la “Diversidá Biolóxica d’Asturies”, coincidiendo col “Añu Internacional de la Diversidá Biolóxica”. El llargor ye llibre. Los rapacinos y les rapacines que participen nel 2u y 3er Ciclu d’Educación Primaria podrán dibuxar el testu presentáu y sedrá valoráu por parte del Xuráu.
CUARTA.- Daránse tres premios por caún d’estos siete ciclos establecíos: Educación Infantil, 1er Ciclu, 2u Ciclu y 3er Ciclu de Primaria, 1er Ciclu y 2u Ciclu d’ESO y Bachilleratu. Fadráse mención especial a los centros de los alumnos y alumnes ganadores del CERTAME con un diploma acreitativu.
QUINTA.- El Xuráu tará formáu por persones averaes al mundu de la narrativa, les artes plástiques y de la educación.
SESTA.- Los trabayos podrán presentase, pol autor o autora o pol centru educativu, al Coordinador d’Enseñanza de la Llingua Asturiana, Plaza d’España, nu 5, pisu 2u, 33007 - Uviéu, hasta’l día 3 d’abril 2010, nun sobre zarráu nel que s’escribirá: XV CERTAME DE POESÍA Y DIBUXU “Diversidá Biolóxica d’Asturies”. Nel sobre meteránse: los dibuxos o les poesíes que llevarán TÍTULU, NOMATU, CICLU y CENTRU del autor o autora, y la PLICA na que s’escribirá la rellación de los y les autores cola so verdadera identidá.
SÉTIMA.- El fallu del Xuráu fadráse públicu na “XXXI Selmana de les Lletres Asturianes”. Los premios del CERTAME daránse’l día 7 de mayu de 2010, na Casa la Cultura de Mieres del Camín, nel actu organizáu pola Conseyería d’Educación y Ciencia y el C.P. “Anicetu Sela” de Mieres del Camín, nel que se celebrará l’homenaxe escolar al Día de les Lletres Asturianes.

OCHAVA.- La participación nel CERTAME supón tar d’alcuerdu coles bases establecíes. Al fallu del Xuráu nun se podrá retrucar.

Fonte: Blogue Tierra alantre, la mesma fala