Ximiélga.me, rede social n'asturianu

El vienres pasáu pela tarde abría oficialmente Ximiélga.me, la primer rede social asturiana que dende va unos meses la primer rede social n'asturianu taba en versión de prebes pa los promotores del proyeutu y pa un bon garrapiellu de blogueros qu'aidaron a rematar la versión beta pública. Ximiélga.me ufre al usuariu una serie de servicios mui asemeyaos a los incluyíos en redes como Facebook o Twitter, como'l 'microblogging', la creación d'álbumes de fotos, la xestión d'enllaces, la integración de conteníos multimedia de Youtube, Dailymotion, Jamendo o Viemo, o el reductor asturianu de señes URL Acurti.es... La rede asturiana ta pensada pa funcionar en too momento como 'amestador' d'usuarios de eses otres redes.

Ximiélga.me integra les sos funciones mui fácilmente con Twitter o Identi.ca, y los conteníos puen espublizase automáticamente n'otres redes como Facebook, MySpace o en sitios de noticies. La integración y interconexón con otres redes va ser una de les estayes nes que Ximiélga.me va puxar más nel so desenvolvimientu futuru. El sitiu ta disponible tamién en castellanu y n'inglés. Ximiélga.me foi desenvueltu por Altuxa.com, alcuñu col qu'el corverán Mikel González empobinare dende l'añu 2000 dellos proyeutos n'internet, na so mayoría relacionaos cola creación de ferramientes web n'asturianu. N'esti casu cuntó col sofitu del coleutivu pa la torna y promoción del software llibre, Softastur, y de la trentena de blogueros que dende xineru vienen testiando la rede enantes de la so apertura definitiva.

Fonte: Infoasturies

(Nota: según Guillermo, nun comentariu a esta entrada n'Infoasturies, dende setiembre de 2009 yá esiste "lotienes.com" que ye una Rede Social fecha n'Asturies, y n'asturianu (amás d'otros idiomes) tal y como avala, por exemplu: http://www.esbilla.net/story.php?title=TuEntidad_primera_rede_social_nasturianu o http://blogs.altuxa.com/tapaponga/socieda-virtual-dende-asturies.html)