XIII Concursu de Cuentos pola Oficialidá del Asturianu

El Conceyu Bimenes ta acabante de convocar el XIII Concursu de Cuentos pola Oficialidá del Asturianu. El plazu de presentación fina'l 2 de xunu, l'actu institucional d'entrega premios va facese el 1 de xunetu cola Fiesta pola Oficialidá de la Llingua Asturiana de Bimenes. La dotación de los gallardones ye de 800€ pa primer premiu, 500€ pal segundu y 350€ pal terceru. Los cuentos han d'unviase a: Ayuntamientu de Bimenes (pal XIII Concursu de Cuentos pola Oficialidá del Asturianu). Martimporra, s/n. CP 33527 – Bimenes.

BASES DEL CONCURSU
1.- Los cuentos han de tar redautaos en Llingua Asturiana, respetando les normes ortográfiques vixentes. Sedrán inéditos, de tema llibre, non premiaos n’otros concursos lliterarios y que nun tean suxetos a nengún compromisu d’edición.
2.- Los rellatos han de tener una estensión másima de 10 folios y presentase mecanografiaos a doble espaciu, per una sola cara. Unviaránse un orixinal, tres copies y una copia en versión informática. Cada autor o autora nun podrá presentar namái qu’una obra.
3.- Les obres, ensin robla, tienen de presentase con nomatu. Ésti apaecerá nuna plica, en sobre zarráu, onde constarán nome y apellíos del autor o autora, númberu del DNI, teléfonu de contautu, señes y currículu (con semeya).
4.- Los cuentos han d’unviase a: Ayuntamientu de Bimenes (pal XIII Concursu de Cuentos pola Oficialidá del Asturianu). Martimporra, s/n. CP 33527 – Bimenes. Afítase’l teléfonu de contautu ya información que vien darréu: 985700367.
5.- El plazu de presentación fina’l día 2 de xunu de 2010 (fecha del matasellos de correos) y l’apertura de pliques, que tendrá llugar na Casa Conceyu de Bimenes, fadráse’l día 28 de xunu de 2010, nun actu abiertu al públicu.
6.- El xuráu tará compuestu por tres miembros cualificaos y presidíu pol Alcalde de Bimenes. Los sos determinos nun podrán retrucase. Cualesquiera de los premios podrá quedar desiertu, según determín del mesmu.
7.- Les obres premiaes sedrán propiedá d’esti Conceyu y nun se devolverá d’oficiu nengún de los trabayos presentaos. Amás, el ganador del concursu tará a dimposición del Conceyu Bimenes pa formar parte del xuráu nes dos ediciones siguientes, polo que, nesi tiempu, nun podrá participar nel concursu.
8.- Nel actu institucional d’entrega de premios, que sedrá’l día 1 de xunetu de 2010, coincidiendo coles cellebraciones de la Fiesta de la Oficialidá de la Llingua Asturiana en Bimenes, fadráse una llectura pública del primer premiu na voz del so autor o autora.
9.- Afítense los premios que vienen darréu:
Primer premiu .................................. 800 €
Segundu premiu ............................... 500 €
Tercer premiu ................................... 350 €
10.- La participación nesti concursu lleva con ella l’aceutación dafechu d’estes bases.

Fonte: Infoasturies