La XXXI Selmana de les Lletres Asturianes va tar dedicada al escritor mierense Xosé Antonio García (1961-1998), creyador representativu del Surdimientu y qu'ocupa un sitiu preferente na lliteratura asturiana de la segunda metada del sieglu XX.
Xosé Antonio García desenvolvió una intensa actividá cultural dende los años setenta y collaboró activamente en revistes lliteraries y en prensa. Amás, dirixó dellos programes de radio y participó nel mundiu editorial. En poesía tien espublizaos dos llibros: Cuartetu de la criación (Casa de Cultura Teodoro Cuesta, 1989) y Alcordances d'un home muertu (Editora del Norte, 1995). Anque dexó inédita producción narrativa, tanto n'asturianu como en castellanu, ye principalmente un poeta figurativu, existencialista, y que reflexona sobre la condición humana y la muerte.
La Conseyería de Cultura y Turismu, al traviés de la Direición Xeneral de Política Llingüística, ta trabayando nel programa d'actos de la XXXI Selmana de les Lletres, cola participación de dellos colectivos, instituciones, creyadores ya investigadores, como'l poeta José Luis Argüelles, y la filóloga Laura Rodríguez Solís, que trabayen na compilación y estudiu de la obra lliteraria de Xosé Antonio García. L'oxetivu final del llabor d'estos investigadores y del homenaxe na Selmana de les Lletres del 2010 ye recuperar y divulgar a un autor y una época, xuntando'l so nome a la nómina de los clásicos de la llingua asturiana de los que se fixo alcordanza n'ediciones anteriores: Teodoro Cuesta, Pepín de Pría, Fernán Coronas, Xosefa Xovellanos, Antón de Marirreguera, María Xosefa Canellada o Enriqueta González Rubín.
Fonte: RTPA-Estaya d’asturianu
Ye xusta la recuperación de la memoria de Xosé antonio García en la XXXI Selmana de les Lletres Asturianes, tá perbién fechu ya que trabayó muchu pola y en la llingua asturiana. Gran aciertu.
ResponderEliminar