Día Internacional de la Llingua Materna

L'alcalde de Piloña y la presidenta de l'Academia de la Llingua roblarán un alcuerdu pa fomentar l'asturianu.
L'alcalde del Conceyu de Piloña, Camilo Montes, y la presidenta de l'Academia de la Llingua Asturiana, Ana María Cano, roblarán un conveniu esti llunes pa promover y espardir l'usu del asturianu. L'Ayuntamientu quier cellebrar asina esti añu'l 'Día Internacional de la Llingua Materna'.

Pa ello prepárense con dos actos "mui especiales y significativos": la robla del conveniu de collaboración y l'abertura d'una esposición basada nel llibru 'Arroz, agua y maíz', de Berta Piñán, ganador de la primer edición del premiu 'María Josefa Canellada' nel 2008, convocáu pola Conseyería de Cultura.

El conveniu va roblase'l llunes, día 22, nun actu públicu na Casa la Cultura de L'Infiestu, "col envís de trabayar conxuntamente na promoción, espardimientu y dignificación social del usu del asturianu nel conceyu de Piloña", según desplicó'l Serviciu de Normalización Llingüística al traviés d'una nota prensa.

L’amuesa de la esposición "Arroz, agua y maíz" basada nel llibru homónimu que, escritu por Berta Piñán ya illustráu por Elena Fernández, ganó la primer edición del Premiu 'María Josefa Canellada' yá pue visitase, y va tar na mesma Casa la Cultura fasta'l 26 d'esti mes de febreru.

Fonte: Europa Press