La Sidra asoleya ‘Noreña y la sidra’, estudiu de Martínez Fernández ganador del Emilio Trabanco 2012

Pablo R. Guardado Los asturianos yá pueden disfrutar del estudiu d’Antonio Martínez Fernández ‘Noreña y la sidra’. Esta obra, ganadora del Premiu Emilio Trabanco na so tercer edición, fai un repás a la historia sidrera del conceyu dende’l sieglu XVIII hasta’l XX. “‘Noreña y la sidra’ ye una aportación novedosa a la historiografía sidrera asturiana, y a la llocal. Una primer hestoria sidrera de Noreña, que quier contribuyir a los estudios socioculturales asturianos y a ser preséu pa investigaciones asemeyaes”, informen dende l’equipu editorial de la revista La Sidra, qu’añade que’l trabayu de Martínez Fernández, vecín de Noreña nacíu nel 1980, “surde d’una investigación afitada nel trabayu archivísticu, hemerográficu y bibliográficu, a la que se-y amiesta material fotográficu, publicitariu y d’ellaboración propia”. Llicenciáu n’Historia con un máster n’Análisis Sociocultural pola Universidá d’Uviéu, l’autor pretende con esti ensayu “emponderar una industria escaecida nel conceyu, la de la sidra, que tuvo un pesu relevante na historia de Noreña”. En concreto, l’historiador estudia la época que va dende mediaos del sieglu XVIII hasta finales del sieglu XX, momentu nel que se vive un procesu de decadencia de la industria sidrera. Na obra, que se centra nel sector sidreru, en xeneral, y na industria sidrera, en particular, Martínez Fernández tien en cuenta les connotaciones socioculturales de la sidra n’Asturies y la importancia del chigre y el llagar como espacios d’ociu y sociabilidá. L’esfuerciu del de Noreña nesti trabayu permitió-y algamar el Premiu d’Ensayu Emilio Trabanco qu’entama La Sidra en collaboración de Sidra Trabanco y que tien como oxetivu gallardonar a los autores qu’estudien sobre’l mundu sidreru. El ganador de la primer edición foi Fernán Gonzali gracies al so ‘Diccionariu sidreru’, mientres qu’Arantzazu Ortiz llevó la segunda pol so estudiu ‘La sidra y la manzana asturiana. De la tradición al arte’. Con esta espublización, Martínez Fernández suma’l so segundu llibru. El primeru foi ‘Exiliu asturianu (1937-1939)’. Presentación, el miércoles Esti miércoles va tener llugar la presentación de ‘Noreña y la sidra’ coincidiendo coles fiestes del Ecce Homo que ta viviendo esta población del centru del país. L’actu va tener llugar, a les 19.30 hores, na Casa Cultura Severo Ochoa, y va contar con una amuesa gastronómica de la cocinera llocal Estefanía Ferreras consistente en pinchos cola mazana y la sidra como protagonistes. Nel entamu d’esta actividá collaboren la Sociedad Noreñense de Festejos y l’Asociación Cultural InfoNoreña. Fonte: Asturies.com