Vanessa Gutiérrez gana’l XXII Premiu Máximo Fuertes Acevedo d’ensayu

El trabayu ‘El paisaxe nuestru’, de Vanessa Gutiérrez, resultó merecedor del XXII Premiu Máximo Fuertes Acevedo d’ensayu qu’entrega la Conseyería d’Educación y Cultura dientro de los sos Premios Lliterarios 2016. Ésti ye’l segundu gallardón que se falla, tres l’Alfonso Iglesias de cómic, de los cinco convocaos.

El xuráu aconceyáu ayeri decidióse por mayoría pol ensayu de la escritora y anguaño presentadora del espaciu ‘Ente toos’ que s’emite na RPA los sábados ente les 16 y 17 hores, al reconocer “el pulsu lliterariu del testu y la modernidá d'una estructura na que se fai dialogar a testos escritos y orales de distintes dómines alredor d'un mesmu paisaxe”, según destaca'l fallu. Fernando Padilla, direutor xeneral de Planificación Llingüística y Normalización, presidió’l mesmu, que tuvo formáu polos escritores y investigadores Luis Casteleiro, José Ángel Gayol –ganador l’añu pasáu con ‘Vértigu. L’atracción del abismu na sociedá contemporánea’–, Marta López Fernández, Elena de Lorenzo y Xosé Miguel Suárez Fernández ‘Tapia’.  

Gutiérrez presentó ‘El paisaxe nuestru’ baxo’l nomatu de Recusa Paigona y lleva una recompensa de 3.000 euros pol gallardón. Nacida n’Urbiés nel 1980, foi redactora del selmanariu ‘Les Noticies’ y presentadora de programes de televisión como ‘Pieces’, amás de collaborar davezu como articulista en ‘El Comercio’.

Autora con Beatriz Redondo Viado del ensayu ‘El país del silenciu’ (2007), la escritora destaca como poeta colos poemarios ‘Onde seca l’agua’ (2003) y ‘La danza de la yedra’ (2004), col que llogró'l Premiu Teodoro Cuesta. Como narradora espublizó ‘Les palabres que te mando’ (2006) y ‘La cama’ (2008). Ye importante destacar que parte de la so obra ta traducida al catalán, al gallegu, al inglés, al checu, al francés y al húngaru, y recoyida en diverses antoloxíes y revistes.

Fonte: Asturies.com

Moreno va falar del españolismu llingüísticu nel Llar La Llegra

Cartelu presentación del llibru 'Errores y horrores del españolismu llingüísticu'

El madrilanu presenta'l so llibru 'Errores y horrores del españolismu llingüísticu'.

Trátase d'un ensayu nel que Juan Carlos Moreno analiza los tópicos fundamentales del españolismu llingüísticu y demuestra, mientres "razonamientos cenciellos, pero sólidos, y exemplos cercanos como'l casu de Navarra que se basen n'erros (la mayor parte d'ellos intencionaos) que producen los horrores de la hexemonía opresora d'una llingua sobre les demás", apunten dende La Llegra. En definitiva, ye "un manifiestu concisu y contundente que se fai esplícita nos detalles más íntimos la ideoloxía del españolismu llingüísticu, predominante na inmensa mayoría de los discursos oficiales sobre l'español anguaño".

La charra del doctor en Filosofía y Lletres y caderalgu de Llingüística Xeneral na Universidad Autónoma de Madrid, que forma miembru de dellos comités de la UNESCO relacionaos cola llingüística y la diversidá cultural, va principiar a les 19 hores d'esta tarde nesti espaciu abiertu uviedín asisitán n'El Postigu Baxu, númberu 40, con entrada llibre.Fonte: asturies.com

CONVOCATORIA I PREMIU LES ASTURIES D’ENSAYU

Ensertáu nel proyeutu Finxos, el Conceyu d’Estudios Xaviel Vilareyo trabaya por atropar los artículos y ensayos alrodiu’l país de Xaviel Vilareyo y Villamil (Mieres del Camín, 1967-Uviéu, 2015), faciendo por honrar la so memoria y espoxigar el so llabor. Poro, convoca’l I Premiu Les Asturies d’ensayu, cola fin d’afalar la investigación y destacar aquellos trabayos qu’afonden na idea de Les Asturies y los países cultural ya históricamente venceyaos, dende un plantegamientu non ideoloxizáu, que va mandase de les siguientes Bases:

Primera: Pueden participar na convocatoria toles persones interesaes, soles o en grupu, ensin tope d’edá, con obres d’ensayu y trabayos d’investigación tanto n’asturlleonés o eonaviegu como en castellán, que afonden na idea de Les Asturies y los países cultural ya históricamente venceyaos, dende un conceptu integrador non ideoloxizáu y dende cualaquier perspeutiva yá fuere cultural, xeográfica, histórica, xurídica, económica, etnolóxica, política… valorándose les propuestes y analises que partiendo de la realidá coxuntural europea d’anguaño abran o afiten perspeutives a futuru, valibles pa la sobrevivencia de la propia entidá política.

Segunda: Los orixinales habrán ser preferiblemente inéditos y presentase en formatu dixital (.doc, .docx o .rtf) en Verdana 11 puntos o similar a doble espaciu, meyor con una estensión aprosimao pente les mil quinientes (1.500) y quince mil (15.000) palabres.

Tercera: Los trabayos empobinaránse per e-mail a: info@finxos.org, enantes del día 31 d’avientu de 2016, incluyendo datos personales y una ficha biográfica del autor o autores, másimu de 500 pallabres.

Cuarta: El premiu consistirá na distinción del trabayu como I Premiu Les Asturies d’ensayu y la so publicación electrónica baxo llicencia Creative Commons na Biblioteca Xaviel Vilareyo, la reconocencia y l’espardimientu al traviés d’Internet y les redes sociales. El xuráu puede conceder tamién accésit a otres obres o dexar el premiu ermu, según el so criteriu.

Quinta: El xuráu tará formáu por persones averaes al proyeutu Finxos.

Sexta: Al fallu del xuráu nun se puede retrucar. Faráse públicu el día 19 de mayu de 2017,coincidiendo col cabudañu de Xaviel Vilareyo y la convocatoria de la viniente edición del premiu.

Sétima: Los trabayos que nun se premien podrán tamién publicase nes mesmes condiciones descrites col preste los sos autores, pasando a formar parte del fondu documental del proyeutu.

Octava: Presentase al premiu supón tar conforme con estes bases. Custiones ayenes que nun tuvieren afitaes nelles podrá resolveles el xuráu.

Uviéu, 19 de mayu de 2016.

(de Nacionalismu Asturianu, 19-05-2016)

Fonte: Tierra alantre, la mesma fala

Cultura convoca la novena edición del premiu “Fierro Botas” d'ensayu

 La Concejalía de Cultura del Ayuntamiento de Xixón ha convocado el premio de ensayo y trabajos de investigación en asturiano “Fierro Botas”, que este año alcanza su novena edición.

 Este galardón, que se convoca para recordar la figura del fallecido sacerdote jesuita Federico González-Fierro Botas (Uviéu, 1942-Vladivostok, 2002), defensor de la lengua asturiana, está dotado con 3.000 euros y la publicación de la obra ganadora.

 Los ensayos han tener más de cincuenta hojas DIN-A4, con 2.500 caracteres como máximo por página, y han de versar sobre la cultura asturiana, rusa o eslava; la memoria social y colectiva de los pueblos asturiano o ruso, o la memoria social y colectiva de Xixón. Los trabajos han de presentarse por triplicado. La fecha límite es el próximo 26 de septiembre.                                                                                      Fonte: (LNE-tierralantre)

Damian Barreiro presenta'l so ensayu sobre la llingua na TV n'Avilés

"Caleya Sésamu. El papel de la televisión na tresmisión interxeneracional d'una llingua" algamó'l Premiu «Máximo Fuertes Acevedo» d'Ensayu "Caleya Sésamu. El papel de la televisión na tresmisión interxeneracional d'una llingua", de Damián Barreiro y Premiu «Máximo Fuertes Acevedo» d'Ensayu, va presentase esti xueves, 7 de mayu, a les 12.00 hores. na Feria del Llibru y Discu n'Asturianu (na Antigua Pescadería Municipal, Avilés). Barreiro trai a colación nel llibru la paradoxa de que "si vamos a entrugar a cualquier escuela vamos poder comprobar que Mickey Mouse ye más famosu que Pelayo; que Dora the Explorer tien más devotos que la Santina; y qu’hai más xente que conoz les aventures de Pocoyó que les de Gonzalo Peláez". Y esi ye'l puntu de partida del so ensayu. Na opinión de Barreiro, "esto pasa n’Asturies, pero lo mesmo podría pasar nuna escuela de Xapón, Suecia o Venezuela; ye probable qu’ente los neños los protagonistes de los dibuxos animaos de moda sían más famosos que los héroes nacionales. Nes xeneraciones anteriores, los mitos fundacionales —y mesmamente la relixón— pasaben de pas a fíos y de güelos a nietos de forma oral, porque ensin radio nin televisión los cuentos contábense xunto’l calor del llar. Yera la forma en que cada sociedá tresmitía la so historia, la so forma de vida y la so llingua. Yera la manera de nun desaparecer como pueblu. Depués, eses histories empezaron a deprendese nos llibros y, más tarde, nes escueles al xeneralizase l’enseñu obligatoriu. Sicasí, agora los mitos que se deprienden son los que salen na televisión. Hai neños asturianos que nun saben lo que ye un trasgu, un busgosu o una xana, pero son quién a dicir de corrío tolos personaxes de la serie Digimon". Damián Barreiro (A Estrada, Pontevedra, 1984) ye llicenciáu en Periodismu pola UPV/EHU. Depués de formar parte de la plantiya del selmanariu Les Notícies y del diariu dixital Asturies.com, collaboró con otros medios de comunicación, como la Televisión Local de Xixón, el periódicu Diagonal Asturies, les revistes Atlántica XXII, Anuariu de la Música Asturiana o Vertigü, amás del diariu La Nueva España na so sección «Escolinos». Nel añu 2013 ganó'l Premiu d'Ensayu «Fierro Botas», convocáu pol Conceyu de Xixón, cola obra "L’espeyu onde miranos: televisiones de proximidá n’Europa Occidental y procesos de recuperación identitaria". Un añu depués fíxose col Concursu d'Investigación Llingüítica de l'Academia de la Llingua Asturiana col artículu "La nación televisada: llingua y identidá nos programes n’asturianu de TPA", espublizáu na revista Lletres Asturianes. Fonte: Asturnews

Presentación del proyeutu editorial de l’Asociación Cultural N’Ast y N'Ast 9 en Noreña

Preséntase en Noreña esti vienres la revista "N'Ast. Cartafueyos d'Ensayu", qu'asoleya l'Asociación Cultural N'Ast coincidiendo cola espublización del so novenu númberu nesti mes d'avientu. El vienres 3 de xineru Noreña va acoyer una charra al rodiu del proyeutu editorial de l’Asociación Cultural N’Ast, la revista “N’Ast. Cartafueyos d’Ensayu”, na que van intervenir el direutor de la espublización asina comu otros miembros del coleutivu que desplicarán cómu nació, en qué consiste, qué oxetivos tien y cómu se pue participar nella. L’actu, organizáu a comuña cola Asociación Cultural InfoNoreña, va tener llugar na sala d’aconceyamientos del Vieyu Depósitu del Agua (Plaza El Rebollín, s/n; xunto a La Torre’l Reló), a les 20’00 hores, y el mesmu va aprovechase pa presentar el númberu 9 de “N’Ast. Cartafueyos d’Ensayu”, polo que se cuntará, amás, cola presencia de dellos de los autores que participen na espublización. Nesta novena entrega de los cartafueyos, pa los que por primer vegada nun se cuntó col sofitu de la Conseyería Cultura, recuéyense los trabayos “Remanar la hestoria d’Asturies” (Xuan Porta Allende); “Totalitarismu (os): notes sobre les sos carauterístiques cimeres y la so aplicación al facismu español” (Natalia Fernández Jimeno); “La llucha de clases na Corona de Castiella” (Eduardo Abad García y Sergio Alonso Pampliega) y “El republicanismu federal na Asturies decimonónica” (Javier Cubero de Vicente). La revista, que tien un llargor de 118 páxines y un preciu de venta al públicu de 10 €, yá ta a la venta nes meyores llibreríes del país, anque tamién se pue mercar al traviés del corréu lletrónicu nast.oficialida@gmail.com. Fonte: Infoasturies

Abiertu'l plazu pa presentar ensayos al VI Premiu Fierro-Botas

El concursu convócalu'l Conceyu de Xixón al traviés de la Conceyalía d'Educación, Cultura, Xuventú y Fiestes. L'almisión d'orixinales acaba'l día 13 de setiembre de 2013 inclusive. Concederáse un premiu de 3.000 € y la publicación del ensayu. Pue participase con obres d’ensayu o trabayos d’investigación nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y colectiva de los pueblos rusu y asturianu; la memoria social y colectiva de Xixón. Más información: Bases completes del concursu Fonte: Asturnews

VI Premiu d'Ensayu y Trabayos d'Investigación Fierro Botas de Xixón

Pablo R. Guardado

Nel so enfotu de facer alcordanza de Federico Fierro Botas, el Conceyu de Xixón ta acabante de convocar la sesta edición del premiu d’ensayu y trabayos d’investigación que lleva’l so nome. El plazu d’entrega de trabayos fina’l 13 de setiembre.

El comprometíu sacerdote xesuita, un namoráu de la cultura asturiana y rusa, perdió la vida nel añu 2002 nun accidente de tráficu en Rusia a los 59 años, dexando atrás un trabayu bayurosu de traducción de testos relixosos a la llingua asturiana. Pol so gran llabor, el Conceyu de Xixón decidió entamar esti premiu col que recordar la so memoria y, al mesmu tiempu, apoyar el trabayu de los investigadores asturianos.

Valoráu con un primer premiu de 3.000 euros –1.000 euros menor que na edición pasada– y la espublización del trabayu, esti concursu empobínase a aquelles obres d’ensayu o trabayos d’investigación en llingua asturiana nos que se recueyan los siguientes ámbitos: investigación sobre la cultura asturiana; sobre la cultura rusa o eslava; la memoria social y coleutiva de los pueblos rusu y asturianu; y la memoria social y coleutiva de Xixón. Éstos nun han de tener menos de 50 fueyes DIN-A4 con 2.500 carauteres máximo per páxina, y el testu ha de respetar les normes de l’Academia de la Llingua Asturiana. Los trabayos presentaránse enantes del 13 de setiembre per triplicao nun sobre qu’incluya una plica en cualquier de los rexistros municipales de la ciudá y nel que tea indicao ‘Premiu d’Ensayu y Trabayos d’Investigación Fierro Botas. Conceyalía d’Educación, Cultura, Xuventú y Fiestes’.

El ganador de la edición anterior d’esti gallardón foi Inaciu Hevia Llavona gracies a un estudiu perintersante sobre la historia de la botella de sidra de Xixón que llevaba’l nome ‘La botella de Xixón. Oríxenes y desendolcu hestóricu de la botella de sidra d’Asturies’. El xuráu del premiu destacó “lo novedoso del tema, rescamplando sobre manera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies”. Asturies.com entrevistó al investigador xixonés tres dase a conocer el so trabayu.

Fonte: Asturies.com

XV Premiu d'ensayu Rosario Acuña

Ta abiertu’l plazu pa presentar obres al Premiu Rosario Acuña d’ensayu.

Rosario Acuña

   L'I.E.S. "Rosario Acuña" de Xixón tien abiertu’l plazu pal decimoquintu premiu d'investigación y divulgación, pal que pueden presentase trabayos hasta’l 15 de marzu de 2013, qu’han ser apurríos o unviaos per corréu (en papel, discu o CDROM) a la Secretaría del Centru: IES “Rosario d'Acuña”, Cai Puertu Vegarada e/n, 33207, Xixón. Pal premiu esisten trés categoríes, una p’alumnos del centru, y dos pa investigadores en xeneral, con categoría temática sobre Xixón y sobre Asturies, y con premios de 2.000 euros.

   Los premios van poder ser declaraos desiertos o concedese “ex-aequo” a pidimientu del Xuráu. Aparte del testu, cada trabayu va acompañar de la documentación gráfica (semeyes, ilustraciones y gráficos) que cada participante considere oportunu. Tolos trabayos van quedar a disposición del IES “Rosario Acuña” que s’acuta tolos drechos de publicación de los premiaos, pudiendo editalos y comercializalos pola so cuenta o por aciu conveniu con otra entidá o editorial. Nel casu de que finalmente se realice la edición, l'importe del premiu va considerase como pagu a tantu alzáu de los drechos d'autor correspondientes.

   El fallu del Xuráu va faese públicu'l 2 de mayu de 2013 y va ser inapellable.

   Más información:  Bases completes del Premiu.

   Fonte: Asturnews.

Presentación del númberu 8 de “N’Ast. Cartafueyos d’Ensayu”

El prósimu vienres, 14 d’avientu, va presentase públicamente’l númberu 8 de la revista “N’Ast. Cartafueyos d’Ensayu”. L’actu de presentación, abiertu a toes aquelles persones que quieran dir, va tener llugar en Xixón, nel Llar Social L’Ayalga (cai Decanu Prendes Pando, 11, baxu), a les 20'00 hores, y nel mesmu participarán tanto miembros de l’Asociación Cultural N’Ast, coleutivu qu’asoleya la revista, como dellos de los autores qu’andechen cola mesma.

Nesta octava entrega de los cartafueyos d’ensayu, pa la que se cuntó col sofitu de la Conseyería d’Educación, Cultura y Deporte, recuéyense los trabayos “Nacionalidá y marxismu. Estratexa y táutica de los pueblos nel so camín haza la lliberación nacional y de clas” (Fonsu Fernández Román); “Gausón Fernande: el paxellu ye símbolu intemporal d’asturianía” (entrevista fecha por José Luis Campal Fernández); “Hestoria d’una espublización nacionaliega: El Fielatu” (Daniel Cueli Canto); “Pregón de la XIII Fiesta de la Oficialidá de la Llingua Asturiana. Bimenes - 2009” (Roberto González-Quevedo González). Pieslla los conteníos d’esti númberu l’ensayu “Un proyeutu unitariu pal nacionalismu asturianu” (Marcos Abel Fernández Marqués), recuperáu de la revista El Fielatu onde s'asoleyó va venti años.

Daniel Cueli Canto ___________

Direutor de “N’Ast. Cartafueyos d’Ensayu”

Pablo Rodríguez Alonso algama’l Premiu Críticu de les Lletres Asturianes na estaya d’ensayu

Pablo Rodríguez Alonso algama’l Premiu Críticu de les Lletres Asturianes na estaya d’ensayu


por Pablo R. Guardado
L’historiador Pablo Rodríguez Alonso consiguió’l Premiu Críticu de les Lletres Asturianes na categoría d’ensayu pol so estudiu sobre’l discursu del diariu Voluntad. La XDLA entama esti gallardón pola ausencia del idioma nos Premios de la Crítica.

'De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad’ ye’l nome del ensayu que convenció al xuráu conformáu por Rafael R. Valdés, Antón García y Xuan Xosé Sánchez Vicente, que falló por unanimidá a favor de la investigación del xixonés “pola so contribución a los estudios históricos, de la que destacaron el rigor nel tratamientu de la información y el so bon facer metodolóxicu, abordando cuestiones históriques internacionales al traviés del estudiu de lo local”. Nesti trabayu –ganador tamién del XII Premiu d’investigación histórica Rosario de Acuñal’– l’autor fai un repás al discursu ellaboráu dende Voluntad, mediu d’espresión oficial del falanxismu xixonés, un periódicu que va ser la voz de los vencedores de la Guerra Civil y nel que los mensaxes de venganza contra los vencíos, d’emponderamientu del totalitarismu nazi y fascista y de denuncia de la democracia y les llibertaes van ser una constante. Sicasí, como conseña’l llibru, esi discursu va dir cambiando a medida que l’escenariu internacional, marcáu pola Segunda Guerra Mundial, vaya averándose a la derrota final d’Alemaña, Italia y Xapón. El llibru ta espublizáu por Zahorí Ediciones.

Rodríguez Alonso (Xixón, 1979) recibió con satisfaición la noticia del fallu d’esti premiu dende’l so domiciliu en Breizh, onde reside por motivos de trabayu. Nun mensaxe na rede social Facebook, quixo dar les gracies “al xuráu del premiu que tuvo a bien valorar esti trabayu; un xuráu formáu amás por trés persones que tanto fixeron, faen y toi seguru van facer pola cultura del país”, y a la Xunta pola Defensa de la Llingua Asturiana“ por entamar estos premios y por siguir lluchando depués de tantos años pol futuru del idioma”. El coleutivu cívicu convoca estos gallardones, de manera esceicional, como respuesta a l’ausencia de la llingua asturiana nos XIII Premios de la Crítica de l’Asociación d’Escritores d’Asturies. De momento, a falta de conocer el ganador na estaya de narrativa, Berta Piñán llevóse’l de lliteratura infantil y xuvenil y Xabiero Cayarga, el de poesía. L’actu d’entrega de los premios va tener llugar el 30 de payares, a les 19.30 hores, na galería d’arte uviedina El Texu. Tres el mesmu, va convidase a los presentes a Vinu de Calidá de Cangas Ḷḷumes y a quesu Afuega’l pitu Cá Sanchu.

Fonte: Asturies.com

Bertu Peña asoleya la so obra ganadora del Premiu "Fierro Botas" d'Ensayu 2011

Alberto Álvarez Peña y la editorial Trabe asoleyan el Premiu Fierro Botas d'Ensayu ganador

2011 La editorial Trabe acaba d’asoleyar, a comuña col Conceyu de Xixón, “Mitoloxía de los santos n’Asturies”, l’ensayu ganador del Premiu «Fierro Botas» d'Ensayu 2011. La obra, d'Alberto Álvarez Peña, rastrexa pente la cultura popular y les ilesies asturianes los raigaños paganos de los que bebió y s’alimentó’l cristianismu de los primeros años. Si, como ta de moda dicir, Europa ye lo que ye pola influencia del cristianismu, nun ta demás alcordar qu’esti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l’Asturies d’anguaño. «Si nun yes a vencer al enemigu, únite a él». Esto paez ser que pensó’l cristianismu primitivu a la d’enfrentase a les creencies anteriores bien enraigonaes ente la xente del pueblu. Cristianizaes les fiestes paganes, hubo de buscar agospiu dientro’l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d’axudar a los humanos na comprensión de los sos fenómenos: d’esa manera los santos católicos nun son otro qu’aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos. Alberto Álvarez Peña (Xixón, 1966) ye un perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros Asturias mágica y Cuélebres, culuobras, culiebres y culiebrones. La culiebra na mitoloxía asturiana. Fonte: Asturnews

Presentóse la revista d'ensayu N'Ast, númberu 7

Esti vienres, 16 de marzu, a les 20 hores cellebróse nel Centru Social L’Ayalga la presentación del númberu últimu de la revista de l’Asociación Cultural N’Ast. Esta nueva edición cunta coles firmes de Carlos Blanco, que presenta un artículu sobro Asturies vista a la lluz de los plantegamientos d’Oswald Spengler; de Xuan Porta, con un trabayu sobro l’osu na cultura asturiana; d’Inaciu Galán, nun analís del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobro la fragua de Fonteta.

Amás de los artículos d'ensayu, recuéyense’l “Manifiestu pola documentación hestórica asturiana espoliada” y dos entrevistes: a Daniel Cueli, direutor de la revista, y a Javier Cubero, responsable d’organización de N’Ast, asoleyaes enantes n’Asturnews.

Pa zarrar la revista, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

El CS L’Ayalya ta asitiáu nel baxu 11 de la cai Prendes Pando de Xixón.

Fonte: Asturnews

‘N’Ast. Cartafueyos d’ensayu’, númberu 7

Pablo R. Guardado
L’Asociación Cultural N’Ast asoleyó’l númberu 7 de la revista ‘N’Ast. Cartafueyos d’ensayu’. Ésti inclúi un ‘Manifiestu pola documentación hestórica asturiana espoliada’ impulsáu pol coleutivu.

El manifiestu, que tien l’apoyu d’ocho organizaciones, centra esti númberu de los cartafueyos y vien acompañáu de dos entrevistes: a Daniel Cueli, direutor de la revista, y a Javier Cubero, responsable d’organización de N’Ast. Yá na estaya d’ensayos, los llectores van atopar nesti exemplar les firmes de Carlos Blanco, que presenta un artículu sobre Asturies vista a la lluz de los plantegamientos d’Oswald Spengler; de Xuan Porta, con un trabayu sobre l’osu na cultura asturiana; d’Inaciu Galán, nun análisis del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobre la fragua de Fonteta (Ayande). Pa zarrar el númberu, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

Les persones interesaes en facese con esta edición nueva de los cartafueyos d’ensayu de N’Ast pueden facelo na sede del coleutivu (L’Ayalga), asitiada na cai Prendes Pando númberu 11 de Xixón, o al traviés del corréu lletrónicu nast.oficialida@gmail.com. Nunos díes tamién va tar a la venta nes llibreríes Paradiso (Xixón) y Ojanguren y Cervantes (Uviéu).

Fonte: Asturies.com

III Edición del Concursu d'Ensayu "Emilio Trabanco Trabanco"

La Sidra convoca la III Edición del Concursu d'Ensayu "Emilio Trabanco Trabanco".

El concursu, que persigue l"aumentar la conocencia y espardimientu de los estreamos aspeutos que conformen la cultura asturiana de la sidra, favoreciendo l'estudiu y la conocencia de la mesma, al empar que s'algama l'aniciu d'un corpus bibliográficu sidreru", ta dotáu con un premiu de 1.500 euros y la espublización de la obra premiada. El plazu pa presentar obres fina l’1 d'avientu de 2011, tienen que tener una estensión mínima de 65 páxines (TNR12, a doble espaciu) y tar escrites n'asturianu o en castellán.

Dende la organización sorráyase que na primer y segunda edición d'esti premiu pudo adicase comu esta convocatoria vien xenerando una cantidá d'información de gran calidá ya interés". y que la recoyida de material "de toa triba " venceyáu al mundu la sidra "ye perimportante a la hora d'evitar perdes inreparables del nuesu padrimoniu cultural, la implicación de profesionales normalmente ayenos al mundiu la sidre permite'l desendolque d'ensayos anovaores qu'aporten idegues nueves y puntos de vista orixinales pa la evolución del alrodiu sidreru".

Fonte: Asturnews

Información apurrida por Manuel

"N'Ast.Cartafueyos d'ensayu", númberu 6

La revista d’investigación Cartafueyos d’ensayu de N’ast asoleya un númberu nuevu, que fai’l sestu na so coleición. Nesta ocasión cuéntase con artículos d’autores como Xuan Porta Allende, David Gimeno i Ayuso, Inaciu Galán y González, Xaviel Vilareyo Villamil, Xulio Elipe Raposo “Xune” y Javier Cubero de Vicente.

El númberu inclúi artículos sobre investigación lliteraria, drechos llingüísticos y hestoria política, ente otros temes.

El volume, del que pue descargase una amuesa en llinia, ábrese con un prólogu del direutor, Daniel Cueli nel que se fala de les novedaes que se presenten na revista na que los miembros de l’Asociación Cultural N’Ast quixeron dase un homenaxe, “xuntando unos cuantos testos nos que se fala, principalmente, de llingua y lliteratura asturianes”. Amás la revista, espliquen, estrena collaboración col Conceyu Bimenes, “primeru d’esti país en declarar la oficialidá de la llingua asturiana”.

Xuan Porta Allende abre les collaboraciones con “La llingua asturiana, ente les llingües nacionales del Estáu español”, siguiendo darréu un artículu espublizáu en catalán, llingua orixinal del autor y asturianu “Oficialitat?. No hi ha alternativa”, de David Gimeno i Ayuso. L’espaciu dedicáu a la lliteratura ábrelu Inaciu Galán y González con un “Averamientu a la figura del escritor Antón Forascepi (1869-1947)” y sigue nes lletres de Xaviel Vilareyo con un estudiu sobre’l “Vocabulariu asturianu na lliteratura de José María de Pereda”.

La revista recueye tamién el Pregón de la XIV Fiesta de la Oficialidá de la Llingua Asturiana. Bimenes 2010, qu’echó Xulio Elipe Raposo “Xune” y vuelve a editar, por fallos d’imprenta na anterior versión “L’Alianza Popular Revolucionaria Americana: Alderique ideolóxicu y práutica política”, de Javier Cubero de Vicente.

La revista aprovecha la ocasión pa convidar a investigadores y hestoriadores a unviar les sos collaboraciones pa númberos próximos. Los trabayos tendrán, como norma xeneral, un llargor máximu de 20 fueyes. Sedrán espublizaos n’asturianu, anque s’almitirán trabayos n’otres llingües, encargándose N’AST de la so torna. Los autores comprométense a correxir una preba d’imprenta.

Cada artículu cuntará obligatoriamente con títulu y nome del autor. Acompañaráse d’una tarxeta onde se comuniquen señes, teléfonu y direición de corréu lletrónicu, los artículos presentaránse en formatu informáticu compatible colos procesadores de testos más avezaos al usu pa ordenadores. La cuenta pa recibir trabayos ye info@n-ast.org

Más información: Descarga de baldre una amuesa de la revista

Fonte: Asturnews

XVI Premiu d'Ensayu "Máximo Fuertes Acevedo"

L'escritor Vicente García Oliva ye’l ganador de la decimosesta edición del Premiu d'ensayu en llingua asturiana “Máximo Fuertes Acevedo”, que concede la Conseyería de Cultura y Turismu del Principáu d'Asturies.

Ente les obres presentaes, el xuráu decidió conceder el Premiu al testu tituláu “El síndrome de Sherezade”, destacando que se trata d'una obra que, con bon estilu narrativu, analiza la necesidá antropolóxica de cuntar hestories y les funciones de los mitos y cuentos populares, con una consideranza especial de la sociedá actual y de la cosmovisión asturiana.

El xuráu que concedió esti gallardón taba formáu pola Directora Xeneral de Política Llingüística, Consuelo Vega Díaz, y los escritores y investigadores Xulio Arbesú, ganador de la edición anterior del premiu; Elena de Lorenzo Álvarez, profesora de Lliteratura de la Universidá d'Uviéu; y Xosé Antón Suárez Ponte, profesor de Bioloxía Molecular de la Universidá d'Uviéu. El premiu ta dotáu con 7.000 euros.

La decisión del Xuráu foi adoptada por unanimidá y tres un alderique final nel que s'envaloró de mou especial l'ensayu “Lliteratura y máscares”, que resultó finalista del certame.

Trayeutoria del autor

Vicente García Oliva (Xixón, 1944) ye miembru de númberu de l'Academia de la Llingua Asturiana. Tien una ventena de llibros publicaos n'asturianu y castellán, nos que cultiva tantu la lliteratura infantil como la novela policiaca o l'ensayu.
Ye tamién ganador de diversos premios lliterarios: el Premiu “Llectures pa rapazos”, de l'Academia de la Llingua Asturiana; el Premiu “Montesín”, de la Editorial Trabe; y el Premiu de la Crítica d'Asturies, ente otros.

Fonte: Asturies.com

III Premiu d'Ensayu Fierro-Botas

La Conceyalía de Cultura Tradicional y Llingua Asturiana del Conceyu de Xixón, nel so enfotu de facer alcordanza de la figura de Federico González-Fierro Botas convoca otra vegada’l Premiu d'Ensayu "Fierro Botas" que tien comu plazu final de presentación esti prósimu 31 d’agostu.

Esti premiu empobínase a aquelles obres d'ensayu, o trabayos d'investigación, nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y coleutiva de los pueblos rusu y asturianu; la memoria social y coleutiva de Xixón.

El premiu ye de 4.000 euros ya inclúi la espublización de la obra. Les primeres dos ediciones ganóles Rafael Rodríguez Valdés por “Discursos llingüísticos y movimientu obreru na Asturies decimonónica” y Javier Cubero de Vicente por “Del romanticismu al rexonalismu: escritores carlistes na lliteratura asturiana”.

Más información: Bases completes

Fonte: Asturnews

Ier Premiu d'Ensayu "Asturies"

Col enfotu de da-y puxu al estudiu de la realidá política, económica, social y cultural d’Asturies, asina como al so pensamientu, la editorial Espublizastur convoca’l “Ier Premiu d’Ensayu ASTURIES" pa obres escrites n'asturianu. El premiu ta dotáu con 1.500 euros y la editorial espublizará de la obra premiada. El plazu pa presentar los ensayos a esti premiu fina'l 1 de payares. El premiu tien les bases que vienen darréu:

Capítulu Primeru: Oxetu.
Artículu 1.- Les obres que se presenten al “Ier Premiu d’Ensayu ASTURIES” tendrán que versar alrodiu la realidá política, económica, social y cultural d’Asturies –nos sos territorios hestóricos- y los sos retos de futuru.
Artículu 2.- Valoraránse especialmente obres que combinen la esposición teórica, la so aplicación práutica y la so exemplificación al traviés de comparatives con otres realidaes nacionales.

Capítulu Segundu: Condiciones de les obres
Artículu 3.- Les obres tendrán de ser estrictamente inédites y nun podran tar premiaes anteriormente.
Artículu 4.- Toles obres tendrán de tar escrites n’asturianu.
Artículu 5.- Les obres tendrán una estensión d’ente 120.000 y 240.000 caráuteres. (unes 60 páxines, lletra 12, con un interlliniáu de 1,5.)

Capítulu Terceru: Conteníu del premiu
Artículu 6.- El “Ier Premiu d’Ensayu “ASTURIES” ta dotáu con 1.500 euros (1250 en metálicu y 250 en llibros) que se fadrá efeutivu nel intre de la so concesión pública.
Artículu 7.- La obra premiada sedrá espublizada pola editorial Espublizastur
Artículu 8.- Espublizastur resérvase’l drechu a espublizar aquelles obres non premiaes, entendiendo que la presentación al mencionáu premiu supón la cesión a la editorial de los drechos d'edición.
Artículu 9.- Si el Xuráu lo camienta afayaízo, el premiu podrá ser consideráu desiertu y esceicionalmente concedíu ex aequo.

Capítulu Cuartu: Resolución del premiu
Artículu 10.- La resolución del “Ier Premiu d’Ensayu “ASTURIES” dirá a cargu d’un Xuráu compuestu por cinco personalidaes destacaes del mundiu cultural, social, políticu y económicu, propuestos por Espublizastur xunta un representante de la mesma.
Artículu 11.- Nun entamu, la resolución del Ier Premiu d’Ensayu “ASTURIES” intentará decidise por consensu ente los miembros del Xuráu. Si ello nun fore posible procederáse a una votación que decidirá por mayoría simple.
Artículu 12.- La resolución del premiu fadráse pública’l 7 de payares.

Capítulu Quintu: Presentación de les obres
Artículu 13.- El términu de presentación d’orixinales fina’l día 1 de payares. Almitiránse toles obres cuya fecha d’unvíu postal seya anterior al pieslle de la convocatoria.
Artículu 14.- Habrán d’unviase a la direición postal: Espublizastur La Caleya'l Ríu, 205 CP 33394, Xixón, Asturies.
Artículu 15.- Recurriráse a la forma de plica, ello ye, axuntaránse 2 sobres zarraos ónde s’escribirá: “Premiu d’Ensayu ASTURIES”, faciendo constar nos dos el títulu de la obra y el seudónimu del autor. Nún d’ellos introduciránse l’orixinal y 5 copies, en cuyes portaes namái apaecerá’l títulu de la obra y el del autor o’l seudónimu. Nel otru sobre figurarán los datos personales del autor o autores (nome, direición postal, teléfonu y e-mail). Nesti segundu sobre axuntaráse una copia en formatu dixital del orixinal.
Artículu 16.- L’autor/es comprométense a nun retirar la obra enantes de faese pública l’alxudicación del premiu y a nun presentala a otros concursos en cursu nin en xeneral, a tener comprometida la so espublización. La obra tien que ser inédita, nun tener cedíos los drechos con anterioridá
Artículu 17.- La presentación d’orixinales implica l’aceutación d’estes bases, qu’actúen en valir de contratu d’edición.