18/8/15

Recomendaciones pa díes de folgueta


Céline Sciamma, Tomboy

  UNA PELÍCULA: Tomboy, de Céline Sciamma. Sigue’l Cine de la 2 ufiertándonos bones películes. Nesti casu trátase d’un film de la direutora franesa Céline Sciamma que lleva por títulu Tomboy. Agora que la mayoría del cine norteamericanu pa rapazos estrémase ente los superhéroes más o menos violentos, o les pelis d’animación, esta cinta europea supón una rabasera d’aire fresco pa los que nos presten les histories empobinaes a la xuventú.
  Una familia treslládase a vivir a un pueblu a les afueres de París. Colos pás, viaxen dos neñes, una yá na llende de l’adolescencia y otra más mocina, d’unos seis años. La mayor tien un corte de pelo y una figura que bien pue pasar por un mocín, y eso ye lo que fai delantre de los sos nuevos amigos. Pero les coses van complicase cuando la so vecina, otra adolescente de la mesma edá, siéntese atrayía por ella creyendo que ye, daveres, un neñu. La direutora xuega con esa indefinición sexual de los pocos años, y colos “rolles” que caún de los sexos aveza a xugar. Asina, la protagonista tien que se pegar con otru rapaz, como fadría un neñu, por defender a la so hermana. En cualquier casu, la prosimidá del cursu fai que l’engañu nun pueda durar y les consecuencies, ensin llegar a ser dramátiques, sí suponen un pequeñu trauma familiar.
  La direutora muévese pola película con sensibilidá y emoción, construyendo una historia cenciella pero que llega a l’alma del espeutador.  Ta aidada por dos grandes/pequeñes actrices: Zoé Héran, nel papel del neñu/neña, y Malonn Lévana, nel de la so amiga. Una película, en resume, que paga la pena ver sobre too porque ye dalgo diferente a lo que suel ufiertar el cine americanu. Recomendada dafechu. 
                                                                                Fonte: trabayudecampu. com/Vicente García Oliva/asturies.com

2 comentarios:

  1. Lliteratura xuvenil bien afayaíza pal branu.

    ResponderEliminar
  2. ¿Qué asocede, qué pasa, que nesti blogue nun se publicar los comentarios?

    ResponderEliminar

Los comentarios tán pendientes de moderación. Espublizaránse lo primero dable.