Somos Avilés quier más presencia del idioma n'eventos culturales

Presentó una moción que va aldericase nel Plenu municipal del 20 d'agostu.

Ésta pretende la 'Inclusión de Cláusules pal Favorecimientu de la Presencia de la Llingua Asturiana nes Ayudes o Subvenciones Concedíes pa la Organización d’Eventos Músico-lliterario-culturales' y tien como oxetivu una mayor presencia del idioma nes actividaes culturales del conceyu ensin falta de sumar más gastu a les arques municipales. Asina, tomando como referencia l'Estatutu d'Autonomía y la Llei d'Usu y Promoción del Bable/Asturianu, Somos Avilés apunta que "creyemos conveniente establecer, ensin amenorgar la independencia y llibre decisión de les entidaes y asociaciones, unes cláusules o pautes que favorezan la inclusión de la llingua asturiana nes actividaes que cuenten con ayuda del Conceyu. Asina, llograríase la presencia d’artistes, autores y músicos locales y del restu d’Asturies, cola consiguiente promoción llingüística que conllevaría ensin que supunxese un costu añadíu a les arques municipales".

"La visibilización del entramáu cultural propiu tien de ser ún de los oxetivos de la política de les alministraciones públiques, tamién del que s’espresa en llingua asturiana. Hai de ser conscientes, amás, de que si esa promoción de los creadores qu’utilicen esta llingua nel so trabayu nun la faen les administraciones asturianes naide la va facer. L’actividá cultural n’asturianu –sobremanera nel campu lliterariu o musical– ye ún de los grandes llogros de la sociedá asturiana nes últimes décades, que favorez la imaxe de país y singulariza a la nuesa sociedá nun mundu cada vez más homoxenizáu, amás de too ello nun podemos escaecer l’aspectu económicu nuna midida como la que proponemos, al asegurar qu’una parte del presupuestu dirixíu a estes ayudes reportaría en beneficiu del texíu cultural propiu", continúa la candidatura de xunidá popular.

Fonte: Asturies.com