La Xunta Xeneral crea una comisión de proteición del asturianu

Propuesta d'IX cola oposición del PP y Ciudadanos.

La Xunta de Voceros de la Xunta Xeneral aprobó esta mañana la creación d'una comisión de proteición de la llingua asturiana y el gallego-asturiano a propuesta d'Izquierda Xunida.

La iniciativa contó col sofitu de la FSA-PSOE, dientro del alcuerdu d'apoyu a Javier Fernández na investidura algamáu cola coalición, asina como de Podemos y Foro. Tanto PP como Ciudadanos amosaron la so disconformidá cola midida al nun considerala prioritaria.

Tovía nun se conocen los detalles d'esta comisión, anque dende IX apunten que busca la promoción del idioma como respuesta a la falta d'oficialidá. Podemos, pese al so sofitu a la mesma, apuntó qu'ésta ye insuficiente y recordó lanecesidá de reformar l'Estatutu pa incluyir la equiparación de los derechos de los falantes d'asturianu col de restu de ciudadanos.

L'oxetivu d'IX ye qu'esta comisión pueda rematar los sos trabayos y conclusiones, y ufiertar distintes alternatives sobre'l réxime de protección y promoción del asturianu, nun plazu de seis meses dende la so constitución.

Entiende'l grupu d'IX que depués de más de 30 años d'autonomía, llegó'l momentu de que Asturies tenga un futuru cultural como sociedá articulada, non escluyente y con futuru, asumiendo programáticamente la necesidá d'un gran consensu políticu y social sobre les midíes necesaries pa la normalización sociolinguistica de la llingua, el so nivel de protección, el  so impulsu y la so definitiva aceptación social.

Esi consensu debe modulase, según IX,  dende la más amplia participación social y ciudadana y esi ye l'oxetivu d'esta comisión non llexislativa.                    Fonte: asturies.com