Ex libris

TÍTULU: La isla de la infancia

AUTOR: Karl Ove Knausgárd

TORNA: Kirsti Baggethun y Asunción Lorenzo

EDITORIAL: Anagrama

AÑU: 2015

AUTOBIOGRAFÍA DE CALIDÁ.- Siempres creyí qu’un autor escribía les sos memories, o la so autobiografía, cuando yá yera un personaxe, sinón consagráu, polo menos  reconocíu -esceición del casu asturianu nel que s’escriben memories a los venti años-. Dicho d’otru mou, nun entendía que la historia personal de dalguién desconocíu pudiere interesar al públicu llector. ¿Pa qué queremos saber de la vida d’un paisano del que nun tenemos referencies? Ensin embargu, el casu d’esti autor ruempe esa regla non escrita porque la notoriedá viéno-y, precisamente, pola escritura de les sos memories.

Karl Ove Knausgard (1968) ye un autor noruegu que salto a la fama (más bien la fama de los críticos lliterarios que la del gran públicu pal que, camiento yo, sigui siendo un desconocíu) por mor del primer volume d’unes ambicioses memories qu’ocupen na menos que seis llibros. Les memories lleven por títulu xenéricu Mi lucha, y aquel primeru qu’apaeció n’España titulábase como esi famosu síndrome entudiáu pola siquiatría: La muerte del padre. Por si nun fuere abondo la novedosa apaición d’esti desconocíu escritor, les sos memories tampoco nun van per orde cronolóxicu, de tal manera qu’esti tercer tomu que nos ufierta Anagrama ye’l de los primeros años de la so vida.

El pequeñu Karl Ove llega a un nuevu pueblu y a una nueva islla -Tromoya- con seis meses, nun carruchu tiráu por so madre. Y a lo llargo de la novela va a cuntásenos, na so propia voz, lo que fueron los sos primeros 13 años de vida. Una vida que se bancia ente’l llar y la familia, la escuela, los amigos, les amigues, los xuegos y diversiones, los primeros amorucos… Karl Ove ye un neñu con un altu conceutu de sí mesmu, de los que piensa que, nun sólo pue facer tolo que se proponga, sinón que cuando lo fai ye’l meyor de toos. La realidá, claro, ye bien distinta y d’ehí les sos abondoses deceiciones y les sos munches llantines. Ye tamién un rapaz reflesivu que siempre da vueltes a lo que-y pasa, y cuando nun ye a atalantalo, entrúga-ylo al so hermanu mayor que, la verda, tampoco nun s’ocupa muncho d’él. Pero lo que va a condicionar dafechu tola so infancia ye’l padre. Un personaxe malváu, autoritariu, caprichosu, al que-y tien un mieu cerval. La figura del padre enllena, negativamente, la neñez y la mocedá del rapaz que, namás cuando ta lloñe d’él siente dalgo asemeyao a la felicidá.

La novela ta escrita con un tonu de desnudez que pudiere engañar en cuantes a la so calidá lliteraria. Una cenciellez que, sobre too al empiezu, faise un poco reiterativa al detenese en detalles pequeños, cotidianos, que nada aporten a la narración: el neñu garra la taza, echa’l Cola-Cao, garra la cuyara, revuelve, calienta, bebe, llimpia… nuna socesión de simpleces que retarden n’escesu l’aición y fain engordar al llibru qu’algama les 500 páxines. Pero,  pasu ente pasu, va coyendo pulsu la cosa y termines por afondar na vida del rapaz, los sos pruyimientos y deseyos. Ye mui novedoso, pa nosotros llectores asturianos, el mediu ambiente nel que se desendolca la vida del protagonista, con islles, nieve y esos horarios nórdicos nos que los díes y les nueches nada tienen que ver colos nuestros. Trátase, entós, d’una interesante novela, que pese al so escesu de páxines, lléese con interés llegando a la conclusión que, pese a les distancies vitales y ambientales, los sentimientos de los neños, la so gana de vivir, les trastaes que faen y hasta la forma de rellacionase nun disten muncho de los de los neños d’otres partes del mundu. Los nuestros incluyíos. Habrá que siguir de cerque la vida d’esti Karl Ove y les sos andances de más mayor, a ver en qué apara la cosa.        Fonte: trabayudecampu. com/Vicente García Oliva/asturies.com