Un cientu organizaciones sofiten a RadioKras y Radio QK

Les dos emisores enfréntense a multes d'hasta 200.000 euros

  Cásique un cientu d'asociaciones, instituciones polítiques, culturales y sociales asturianes y del tol Estáu vienen amosando la so más enérxica protesta polos espedientes sancionadores abiertos pola Conseyería d'Economía y Emplegu del Gobiernu asturianu contra Radio Kras de Xixón y Radio QK d'Uviéu, emisores llibres y comuñales hestóriques en Asturies, que pueden derivar en multes d'hasta 200.000 euros y el zarru de les mesmes.

  Les asociaciones denunciaen el llabor de la Xefatura de la Inspección Provincial de Telecomunicaciones n'Asturies (dependiente del Ministeriu d'Industria) que realiza actes d'inspección contra les radios comuñales asturianes mientres el mesmu Ministeriu incumple la Llei de Comunicación Audiovisual de 2010, que marcaba un plazu de doce meses pal desenvolvimientu reglamentariu de dicha Llei lo que dexaría l'accesu a llicencies a les radios llibres y comuñales.

  Trátase, por tantu, pa estes asociaciones, firmantes d'un manifiestu de sofitu " d'una midida d'acosu y de criminalización escontra les radios llibres asturianes por una situación d'irregularidá xurídica que ye responsabilidá de l'Alministración estatal y autonómico".

  Asturies cunta con una importante tradición de les denominaes radios llibres y comuñales qu'empezaron a surdir a principios de los años 80. A pesar del importante llabor desenvueltu por estes iniciatives ciudadanes nel campu de fomentu de la cultura asturiana, la participación ciudadana, el pluralismu y l'exerciciu de la llibertá d'espresión, les distintes Alministraciones refugaron la reconocencia llegal d'estes emisores dexándoles nuna situación de precariedá ya indefensión.

  En llugar d'actuar contra les radios comuñales, ye necesario palos firmantes d'esti manifiestu que se faiga efectivu l'artículu 4.1 de la Llei 7/2010, de 31 de marzu, Xeneral de la Comunicación Audiovisual que textualmente indica “Toles persones tienen el derechu a que la comunicación audiovisual empréstese al traviés d'una pluralidá de medios, tanto públicos, comerciales como comuñales que reflexen el pluralismu ideolóxicu, políticu y cultural de la sociedá”.              
Fonte: Asturnews