Cuenta atrás pal primer Arcu Atlánticu ensin Rubiera

Recreación de la comunidá que xunió enantes de los romanos a astorganos y asturianos

  Queden 8 díes pal entamu del IV Festival Arcu Atlánticu, el primeru ensin Carlos Rubiera, principal valedor d’esti certame que fai que Xixón torne a mirar al mar per diez xornaes.

  Ana Montserrat López Moro, la conceyala nueva d’Educación y Cultura, encargóse de presentar esta edición del certame acompañada de Xosé Nel Riesgo, direutor de la Fundación Municipal de Cultura, Educación y Universidá Popular; la responsable del Teatru Xovellanos, Teresa Sánchez Rodríguez; y representantes de Cabrales y Ribeseya. Estos dos conceyos son protagonistes esti añu xunto con Cangues d’Onís, la ciudá francesa de Le Mans y les portugueses de Braga, Guimarães y Nazaré.

  La zona d’El Muelle va ser otru añu más l’epicentru de toles actividaes, ente les que destaca l’Arcu Lliterariu, entamáu pola Asociación Cultural L’Arribada, qu’esti añu va mirar a Galicia. Tamién va haber espaciu pa la gastronomía, el cine, l’artesanía, los deportes y xuegos tradicionales, la danza, el folclór, la tradición marítima y pesquera, los productos de la tierra y el turismu, ente otros.

  Como nun podía ser d’otra manera, la música ocupa un llugar destacáu, con conciertos de primer nivel na Plaza Mayor. Asina tán previstes les actuaciones de la Dominic Graham School irlandesa (vienres 24) tres la inauguración del festival; de la Kumpania Algazarra (domingu 26); de Folk On Crest y La MODA (miércoles 29); y de Kepa Junkera (xueves 30).

Programes completos  Nesti enllaz pue consultar el programa completu del IV Festival Arcu Atlánticu, que va desendolcase del vienres 24 al domingu 2 d’agostu. Nesti otru, el d’Arcu Lliterariu.                                                                                                    Fonte. Asturies.com