La entrada de Genaro Alonso nel Executivu como conseyeru d’Educación y Cultura nun pue quedar namái nun “xestu” n’opinión de la XDLA, que demanda al Gobiernu tresversalidá na normalización del asturianu.
“El nomamientu d'un conseyeru d'Educación y Cultura sensible al asturianu nun pue ser namás un xestu y ha venir acompañáu por un Gobiernu enteru qu'asuma la visibilización y tresversalidá de la normalización, por equipos de trabayu de valir y capacidá, y pol control de contino de los grupos parllamentarios comprometíos cola oficialidá y la defensa de los derechos llingüísticos”, apunta la Xunta pola Defensa de la Llingua Asturiana (XDLA). Nesi sen, esplica que “el primer problema ye si nun hai una voluntá de facer política llingüística, sinón de facer política de distracción. Porque, si ye asina, da igual en qué nivel xerárquicu se ponga la política llingüística nin qué persona tea al frente. Será un home o una muyer de paya, un parapetu, que ta ellí p'adornar, pa facer que fai o pa facer lo que-y dexen namás, como hasta agora. Esperamos que Genaro Alonso lleve alantre'l so mandatu y pueda ser consecuente nel so llabor cola sensibilidá que tien hacia l'asturianu”.
La organización cívica yecrítica colos responsables de Cultura nesta llexislatura, Ana González como conseyera y Alejandro Calvo como viceconseyeru, “dos persones a les que nun-yos da más l'asturianu, como se demostró na presencia escasísima d'ellos nos actos de la Selmana de les Lletres y, nel casu de la conseyera, na so negativa a usar l'asturianu oralmente neses actividaes tan simbóliques”. Por ello, entiende que pese que “l'aumentu de nivel institucional y xerárquicu de la Política Llingüística (dende va años encuadrada nuna dirección xeneral) ye necesariu y supón, de mano, más autonomía y capacidá de decisión, la realidá d'estes últimes llexislatures demostró que nun valió pa impulsar un planeamientu efectivu de normalización llingüística”.
Asina, enumera “la paralización y los retrasos nestos años de les poques actividaes que llevaba alantre la direición xeneral (subvenciones, premios lliterarios, Premiu al Meyor Cantar, Axenda Didáctica, Xunta de Toponimia, etc.)” y “na ausencia d'iniciatives normalizadores, nel abandonu de la Rede de Normalización Llingüística nos Conceyos, nel usu nulu de la toponimia yá oficial pola Conseyería d'Educación, Cultura y Deporte, nel recorte progresivu d'ayudes, etc.”.
Usu del idioma nulu fuera de la conseyería de Cultura “Esti análisis tan negativu tovía sería peor si'l puntu de vista fora más global y abarcara tol Gobiernu asturianu, porque hai que recordar que l'usu del asturianu o de la toponimia oficial ye nulu fuera de la Conseyería de Cultura. Pa bien ser, la política llingüística nun tenía que depender namás de Cultura, sinón ser tresversal a tol organigrama de Gobiernu dependiendo de Presidencia”, continúa la XDLA, pa depués recordar la necesidá d’enfotu p’avanzar na normalización del idoma.
“El PSOE tien demostrao de sobra nestos años la so capacidá pa engañar a los sos socios de Gobiernu en materia llingüística. Saludamos la existencia d'una conseyería, una viceconseyería, una dirección xeneral y un serviciu que puedan llevar alantre la política llingüística. Fai falta poner al frente a persones de valía y prestixu reconocíu, pero al empar tamién va facer falta un control de contino al Gobiernu por parte de los grupos realmente comprometíos cola oficialidá y los derechos fundamentales de la cuidadanía asturiana. Y esto tien que facese basándose nun plan de midíes normalizadores clares, con oxetivos, presupuestos y feches pa poder contrastales, non en promeses vagues que queden en nada”, fina’l comunicáu la organización cívica. Fonte: asturies.com
Sobre esta tema ta yá tou dichu, pero sigue tou por faer.
ResponderEliminar