18/10/14

Families del C. P. Clarín de Xixón denuncien que la Conseyería d'Educación nun garantiza l'asignatura de Llingua Asturiana en condiciones dignes

Colexu Públicu Clarín,  Xixón

   Según Iniciativa pol Asturianu, delles families con fíos matriculaos nel colexu públicu Clarín de Xixón denuncien que los sos fíos nun tienen accesu a l'asignatura de Llingua Asturiana nes condiciones de dignidá y calidá mínimamente esixibles. Nun comunicáu, informen que'l centru nun cuenta col profesoráu suficiente pa poner clases d'asturianu por mor de la gran demanda, y la respuesta de la Inspección educativa de la Conseyería d'Educación nun foi otra que dar por bono que los escolinos d'esti colexu se xunten en grupos de cursos distintos, (terceru y cuartu de primaria y quintu y sestu) xenerando grupos d'hasta 29 alumnos, cuando la ratio máxima ye de 25),onde conviven escolinos que tienen que trabayar con dos llibros distintos y materia diferente acordies col so nivel educativu y  en namás dos sesiones de 45 minutos a la selmana.
   Iniciativa pol Asturianu presentará una quexa a la Conseyería d'Educación y Cultura polo que considera un nuevu casu de marxinación y maltratu a l'asignatura de Llingua Asturiana. La organización esixe a la Conseyería d'Educación qu'aumente el númberu d'hores del profesoráu de Llingua Asturiana del centru, acordies coles necesidaes de matriculación.  
   Nel mesmu comunicáu, solicita tamién al centru la so collaboración, pidiéndo-y que reclame a la Conseyería una solución pa esti tratu llamentable del alumnáu que decide escoyer asturianu de forma voluntaria.                                                                                      Fonte: asturies.com

5 comentarios:

  1. Yá tamos otra vegada col mesmu asuntu.

    ResponderEliminar
  2. Vaya tropa... con la Conseyería hemos topado, asturianos.

    ResponderEliminar
  3. Traten a la llingua asturiana en del los colexos d'un mou impresentable. Oficialidá darréu!!!

    ResponderEliminar
  4. ¿Oficialidá darréu? nun sé cómo si el nueso gobiernu asturiano refúgala y la xente quésase tan sele.

    ResponderEliminar
  5. Ye bien difícil y complicáu, sicasí misión imposible.

    ResponderEliminar

Los comentarios tán pendientes de moderación. Espublizaránse lo primero dable.