El llargumetraxe "Bernabé" abre en Llangréu'l ciclu de cine "Baxando pa la galería"

V Xornaes culturales  2014, "De Castilletes y Carbón"

   Tres la bona esperiencia del añu pasáu, repite nel Cine Felgueroso de Sama’l ciclu ‘Baxando pa la galería’, qu’abre esti miércoles el llargumetraxe n’asturianu ‘Bernabé’. Esta iniciativa ta enmarcada nes quintes xornaes culturales ‘De Castilletes y Carbón’.

   Tolos miércoles d’ochobre van proyeutase de baldre películes cola fin d’allargar per tola seronda esta actividá de dinamización cultural qu’entama de manera conxunta la Fundación Nuberu y el Conceyu de Llangréu baxo’l nome ‘De Castilletes y Carbón’. Nella interrellaciónense’l cine, la mina, la música, la lliteratura, la economía o la gastronomía, con propuestes selmanales hasta’l 4 d’avientu, Santa Bárbola, cuando una actuación de Nuberu pon el ramu a les xornaes.

   El filme de Pablo Casanueva, ‘Bernabé’, rodáu dafechu n’asturianu y protagonizáu por Fernando Martínez, va abrir esta tarde, a les 20 hores, el ciclu. La película trata la vida del bandoleru llaniscu Bernabé Ruenes, un personaxe mui popular na zona que se vio obligáu a echase al monte tres ser condenáu a cadena perpetu na década de los 40. Esti fechu provocó l’empiezu de munches aventures recordaes polos más mayores del llugar, nes que la realidá y la lleenda munches vegaes amiéstense.

   Les otres películes que van completar el ciclu ‘Baxando pa la galería’ son les producciones estauxunidenses ‘The Molly Maguires (Odio en las entrañas)’ (día 8) y ‘Qué verde era mi valle’ (día 15), y les de sellu asturianu ‘Resistencia minera’ (día 22) y ‘Pídele cuentas al rey’ (día 29). Toes van proyeutase a les 20 hores.

L’actuación de Nuberu, en Rusecu    Pendiente tovía por zarrar el programa definitivu de ‘Los Xueves de Castilletes y Carbón’, ciclu de charres que se desendolquen a lo llargo de payares, lo que sí ta confirmáu ye’l llugar onde esti añu va celebrase’l conciertu de Nuberu pa festexar a la patrona de los mineros. Tres pasar per La Felguera, L’Entregu y La Pola Llaviana, l’eventu continúa cola so xira per tol valle del Nalón y va tener como sede Rusecu.                                                                   Fonte: Asturies.com