Más d’un centenar de persones va participar nesta edición de la UABRA

UABRA, Cangas del Narcea

 Unos 90 alumnos y más d’una ventena de profesores van participar na octava edición de la Universidá Asturiana de Branu (UABRA). Cangas del Narcea torna a acoyer los cursos de l’ALLA, que van desendolcase del 31 de xunetu al 11 d’agostu.

 En total la cifra de participantes supera los 115 nos siete cursos previstos esti añu, los trés clásicos y otros cuatro d’Afondamientu Cultural y Llingüísticu, quedando la inmensa mayoría d’ellos agospiaos na Escuela-Hogar de Cangas en réxime de pensión completa. Nel primer bloque tán l’Elemental de Llingua Asturiana, l’Avanzáu de Llingua Asturiana y el de Gallego-asturiano (Primera fase), que van desendolcase mientres les dos selmanes de la UABRA.

 Mentes, los Cursos d’Afondamientu Cultural y Llingüísticu tienen la duración d’una selmana cáun. Na primera de la UABRA van ponese el de ‘Capacitación pa la Traducción al Asturianu’, con Marta Mori al frente y la participación nel programa informativu de la direutora de la UABRA Cristina Valdés, Alberto Fernández Costales y Héctor García Gil, y el de ‘Nueves teunoloxíes na educación’, con David Melendi como maestru y Xulio Berros como convidáu.

 ‘Cantares, bailles ya instrumentos musicales asturianos’, dirixíu por José Ignacio Suárez García y con Héctor Braga, Covadonga González Muñiz, Xosé Antón Fernández Martínez ‘Ambás’, Ramsés Ilesies Fernández y Llorián García Flórez como profesores, y ‘Averamientu nel cine n’asturianu’, empobináu por Próspero Morán y cola actriz María Cotiello y el realizador Pablo A. Quiroga como participantes, son los programaos pa la segunda selmana. El Conceyu de Cangas del Narcea y la Universidá d’Uviéu collaboren cola Academia de la Llingua Asturiana (ALLA) na organización de la UABRA que, amás de la propia actividá académica, presenta una programación amplia con conferencies, conciertos y una esposición.                                                                                                 Fonte: asturies.com

Iniciativa pol Asturianu denuncia nueves presiones pa evitar la matriculación en Llingua Asturiana

 Iniciativa pol Asturianu denuncia que siguen les presiones pa evitar la matriculación na asignatura deLlingua Asturiana y pon como exemplu l’IES Rosario Acuña de Xixón “onde se presionara a una familia pa que’l so fíu nun siga en Llingua Asturiana en Bachilleratu”.

 Un cursu más dende Iniciativa pol Asturianu siguen recibiendo denuncies de families que dan lluz sobre les práctiques illegales qu’entá esisten en dellos centros educativos d’Asturies y qu’amenorguen la presencia de l’asignatura d’asturianu. Y nesta ocasión, una familia de Xixón vieno acabante avisar de “les presiones recibíes dende la xefatura d’estudios del IES Rosario Acuña pa que’l so fíu nun se matriculare na asignatura de Llingua Asturiana, que’l rapaz lleva tol procesu educativu cursando. La familia recibió una llamada presionando pa que nun se matriculare al menor, al ser el so fíu, según el centru, l’únicu alumnu matriculáu na asignatura en bachilleratu, presionando pa que cambiare la so elección”.

 Recibida la denuncia n’Iniciativa pol Asturianu asesaren a la familia sobre la normativa vixente, y tres informar al centru y dar avisu de que s’interpondría una denuncia, el centru a la fin almite la matriculación del alumnu. Dende Iniciativa pol Asturianu quieren “denunciar esti fechu como un verdaderu ataque al drechu de les families y l’alumnáu a poder cursar l’asignatura Llingua Asturiana en tolos niveles educativos. Recordamos a les families que pasen per procesos asemeyaos a esti, que munches vegaes nun denuncien, que ye importante dalos a conocer y que tienen drechu a que los sos fíos estudien asturianu en tolo niveles”.

 Dende Iniciativa pol Asturianu amás d’esti nuevu casu de represión llingüística “denuncien otra vuelta les condiciones nes que s’atopa l’asignatura de Llingua Asturiana, especialmente en Bachilleratu, onde la Conseyería d’Educación recortó de 4 a 1 hora selmanal l’asignatura, faciendo que garrar l’asignatura suponga tener que garrar otres asignatures complementaries que completen l’horariu. Esiximos a la Conseyería que recupere les cuatro hores nesti nivel y que la inspección faiga’l so trabayu y vixile que nun asocedan casos como’l denunciáu”.                                                    Fonte: asturnews.com

Madrid acoyó'l Día de les Lletres nel Esterior

 La xornada d'ayeri abrió de manera oficial la XXXVIII Selmana de les Lletres Asturianes.

 El Centro Asturiano de Madrid foi la sede del Día de les Lletres nel Esterior, que va cuntó con delles actividaes  qu'empezó a les 20 hores, destacando la presentación del llibru editáu pola Conseyería d'Educación y Cultura con motivu de la gran fiesta de la nuesa lliteratura, de nome 'Escritores asturianes. Antoloxía de testos n'asturianu y gallego-asturiano'. Les autores Lurdes Álvarez, Sofía Castañón y Sabela Fernández participaron darréu nun alderique sobre esta espublización.

 Una actuación musical d'Anabel Santiago y la representación del sainete 'Llíu', de José Ram,n Oliva, a cargu del grupu de teatru Señaldá, completaron les actividaes d'esta xornada que tien l'oxetivu  d'homenaxar xunto cola emigración les nueses lletres. L'añu pasáu esta celebración entamóse en Buenos Aires.                                                     Fonte: asturies.com

Educación y Cultura apostará por midíes con baxos costos económicos na promoción del asturianu pola prórroga

La prórroga presupuestaria, como se presuponía, va llendar enforma los planes del conseyeru Alonso na promoción del asturianu. Nuna respuesta a Gaspar Llamazares apunta qu'apostará por midíes con baxos costos económicos.

Genaro Alonso emplegó pa ello l'asturianu, dalgo non habitual dende l'Alministración. En concreto respondió la entruga parllamentaria plantegada por Llamazares '¿Cuál es la situación y cuál será su reflejo en la prórroga presupuestaria de la dignificación, promoción y protección de la llingua asturiana?' con un testu con siete puntos, al que se-y sumen les midíes previstes de normalización llingüística tresversal pa esti añu.

En primer llugar, el conseyeru reconoz al diputáu d'Izquierda Xunida (IX) que l'aumentu de la partida pa l'Academia de la Llingua Asturiana "pue vese dificultada col nuevu escenariu, deriváu de la prórroga presupuestaria". Tamién los pautos colos ayuntamientos pa caltener los servicios de normalización llingüística, anque nesti casu apunta qu'Educación y Cultura va tratar de "realizar una modificación presupuestaria p'atender les peticiones d'estos conceyos". Llanera, Candamu, A Veiga y Grau trabayen anguaño na creación d'estos órganos.

Les ayudes a medios de comunicación, producción editorial y discográfica n'asturianu tampoco nun van disponer del aumentu presupuestariu previstu: "va ser difícil de realizar yá que les modificaciones presupuestaries previstes pa tal fin tendrán que ser destinaes a otros capítulos". No que respeuta los Premios Lliterarios, les recompenses a los ganadores caltendránse, pero nun se podrá crear el gallardón de teatru como se demanda y como tenía previsto la conseyería.

Onde nun paez que vaya haber problemes ye na cantidá destinada al aumentu de fondu bibliográficu pa biblioteques públiques y centros educativos. Por último, Alonso afirma que "la Proposición Non de Llei d'ellaborar un Plan de Normalización Llingüística pue atopar dificultaes nel desarrollu del mesmu. Munches de les midíes previstes nel Plan de Normalización deberíen dir acompañes d'un presupuestu afayadizu pal so desarrollu".

Los planes pa esti añu

Pese a la situación mala que dibuxa Alonso, el conseyeru apunta que tratará de poner esti añu en marcha "midíes de normalización llingüística tresversal que nun arrecostinen con costes económicos o qu'en tou casu éstos seyan asumibles nes circunstancies actuales". Asina cita la edición n'asturianu de les páxines web de tolos organismos de l'Alministración y l'emplegu del idioma na cartelería y comunicaciones.

Tamién comprométese a promover, "al traviés de la negociación y alcuerdos cola dirección de la RTPA, un tratamientu normalizáu de la llingua y aumentu de programes n'asturianu". Otra midida ye'l "diseñu, organización y desarrollu de cursos de formación especialmente dirixíos al personal de medios de comunicación".

L'usu de la toponimia oficializada por parte de tolos organismos oficiales, la dinamización del funcionamientu de la Xunta Asesora de Toponimia, y la coordinación colos distintos servicios de normalización llingüística, asima como de les actividaes d'apoyu rellacionaes cola enseñanza del asturianu y gallego-asturiano, completen la llista de midíes previstes, abierta a iniciatives nueves de promoción del idioma que sían asumibles pola conseyería.Fonte: asturies.com

Adxuntu	Tamañu
respuesta_del_conseyeru_a_llamazares_sobre_prorroga_presupuestaria_y_asturianu.pdf	212.96 KB

SUATEA pide a la Conseyería que nun “venda fumu” cola especialidá d'asturianu

El sindicatu mayoritariu na enseñanza docente non universitaria n’Asturies, SUATEA, salía esti miércoles al pasu de les declaraciones que’l Conseyeru d’Educación, Genaro Alonso, ficiera nos medios alredor de la Especialidá Docente de Llingua Asturiana, porque pal sindicatu nun hai más que dos soluciones: “Que’l Ministeriu cumpla l’alcuerdu del Conseyu Escolar del Estáu o que’l Parllamentu asturianu conceda la oficialidá”.

SUATEA quier esclariar que “les noticies espublizaes nes que la Conseyería anuncia la creación d’una comisión, a comuña col Ministeriu, pa ellaborar un decretu autonómicu, nun puen entendese como avances pa la creación de la Especialidá, nel momentu nel que namás hai dos soluciones: Que’l Ministeriu cumpla l’alcuerdu del Conseyu Escolar del Estáu nos términos enantes espuestos o bien que’l Parllamentu asturianu conceda l’estatus xurídicu y constitucional que convierta n’oficial el nuesu idioma. Nun caben terceres víes“.

Tóca-y, eso sí, al Conseyeru esixir al Ministeriu d’Educación la modificación de los decretos d’especialidaes; pidir al Gobiernu d’Asturies l’apoyu a la oficialidá del nuesu idioma y dar desplicaciónes clares a la comunidá educativa y profesoráu asturianos del procesu y conteníu de les negociaciones col Ministeriu: “Lo demás ye allongar, vender fumu y distrayemos del compromisu d’algamar LA ESPECIALIDÁ DOCENTE DE LLINGUA ASTURIANA contrayíu pol so Gobiernu dende l’anterior llexislatura”.

Nesti sen, SUATEA quier recordar a la comunidá educativa delles cuestiones que desplica nun comunicáu de prensa qu’asoleyare esti día:

“-Que la creación de la especialidá docente en Primaria y Secundaria ta sofitada dende Asturies pola demanda de la Xunta Xeneral del Principáu d’Asturies, polos sindicatos mayoritarios de la educación pública, poles asociaciones de padres y madres con más implantación, pola Academia de la Llingua Asturiana, pola Xunta de Personal Docente non universitariu, pol Conseyu Escolar del Principáu y a nivel estatal pol Conseyu Escolar del Estáu, que ye la institución que fai’l llabor consultivu, d’asesoramientu y propuestes al Gobiernu español rellacionaes col sistema educativu.

-Ye, efectivamente, falso dafechu dicir que’l Ministeriu nun tien les competencies esclusives pa crear les especialidaes docentes (Adicional séptima LOE, apartáu 2: “Corresponde al Gobierno, previa consulta a las Comunidades Autónomas, la creación o supresión de las especialidades docentes de los cuerpos a los que se refiere esta disposición”). Esta competencia exercióla’l gobiernu al traviés de los decretos d’especialidaes d’Infantil y Primaria, y Educación Secundaria. Nestos decretos, y no referío al enseñu de les llingües, la llexislación recueye que serán especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).

-El Conseyu Escolar del Estáu a propuesta de STES (a la que pertenez SUATEA) fixo va tiempu una propuesta pa desbloquear lo que ye non solo una demanda unánime sinón una discriminación flagrante ya intolerable con un colectivu d’enseñantes que lleva años nuna situación irregular y ensin los derechos que tien el restu de la comunidá educativa asturiana. Esta propuesta consiste en que los reales decretos d’especialidaes amiesten un apartáu que diga: “Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva”.

-Nun ye posible nel ordenamientu xurídicu estatal nin autonómicu crear una especialidá que nun tea fixada pol Ministeriu“. Fonte: Asturnews

L’Academia amuésase esmolecida poles noticies alrodiu de la especialidá

L’Academia amuésase esmolecida poles noticies alrodiu de la especialidá nuna nota de prensa asoleyada esti martes na que pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión.

L’Academia de la Llingua Asturiana vien siguiendo con munchu interés y fonda preocupación les noticies apaecíes apocayá nos medios de prensa escrita, radio y tv., no que cinca a la tramitación de la demanda de la especialidá docente de Llingua Asturiana pal profesoráu d’Educación Primaria y Secundaria.  La síntesis d’estes noticies plantega, per un llau, que’l Ministeriu d’Educación del Gobiernu d’España diz nun tener competencies pa facer posible tal especialidá y, per otru, que, darréu d’ello, la Conseyería d’Educación del Principáu va facer vidable la especialidá al traviés d’un decretu autonómicu (trámite nel que va participar una comisión inter-institucional con representantes cualificaos del Ministeriu y de la Conseyería d’Educación).

Énte estes anuncies, l’Academia de la Llingua Asturiana quier dexar claro lo siguiente:

Resulta inaudito que’l Ministeriu d’Educación tresmita la idea de que’l tema de les especialidaes docentes nun forma parte de los sos atribuciones esclusives, darréu que ye xustamente esti Ministeriu’l que les establez, tanto pal cuerpu de Maestros d’Educación Infantil y Primaria (Real Decretu 1594/2011, de 4 de noviembre), como pal profesoráu d’Educación Secundaria (Real Decretu 1834/2008, de 8 de noviembre, desarrolláu llueu col Real Decretu 665/2015, de 17 de xunetu). Asina, a títulu d’exemplu, les especialidaes docentes n’Educación Infantil y Primaria son: Educación Infantil, Educación Primaria, Llingua Estranxera (Inglés), Llingua Estranxera (Francés), Llingua Estranxera (Alemán), Educación Física, Música, Pedagoxía Terapéutica y Audición y Llinguaxe.

El Ministeriu dispón, del mesmu mou, que tamién son especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria). Ello quier dicir que cualquier concursu oposición y de tresllaos en cualquier comunidá autónoma española ha facese, necesaria y obligatoriamente, acordies coles especialidaes docentes fixaes pol Ministeriu d’Educación, Cultura y Deporte.

Nun se contempla, nin nel ordenamientu xeneral del estáu nin nel de les autonomíes, nenguna posibilidá de crear especialidaes docentes de calter “autonómicu”. Ye dicir, nun hai funcionarios docentes en primaria y secundaria con una especialidá que nun tea fixada pol Ministeriu.

La propuesta del Conseyu Escolar del Estáu (muérganu institucional que desarrolla un llabor consultivu, d’asesoramientu y propuestes al Gobiernu del estáu en rellación con los distintos aspeutos del sistema educativu español) no que cinca a la posibidá de reconocimientu de la especialidá docente de Llingua Asturiana ye que los reales decretos amiesten un apartáu que diga: N’aquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva. Esta ye, xustamente, la posición que defende l’Academia de la Llingua Asturiana.

Darréu de lo anterior, esta institución académica pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión ente la comunidá educativa d’Asturies. A la escontra d’ello, l’Academia encamienta a la Conseyería que la so bona voluntá pa encalzar esta demanda hestórica empobine a una negociación seria y rigurosa coles próximes autoridades educatives del Estáu que lleve a un cambéu, nel sentiu propuestu, de los decretos d’especialidaes. Sedría llamentable dexar pasar una oportunidá que vien sofitada, ente otres instituciones y coleutivos, polos sindicatos mayoritarios de la educación pública n’Asturies, poles asociaciones de padres y madres con más implantación na nuesa comunidá, pola Xunta Xeneral del Principáu d’Asturies, pola Xunta de Personal Docente non universitariu, pol Conseyu Escolar del Principáu y, como viemos enantes, pol propiu Conseyu Escolar del Estáu.

Y una consideración cabera más: toos estos y otros problemes que torguen el normal allugamientu normativu de la llingua asturiana y la so dignificación nun desapaecerán dafechu mentantu l’idioma de los asturianos nun algame l’estatus, xurídicu y constitucional, d’oficialidá.

Fonte: Asturnews

Educación saca bolses d’interinos pa llingua asturiana y gallego-asturiano

Un día después de que SUATEA denunciara la falta de profesoráu, apaez la convocatoria de bolses d’interinos ente les que s’inclúi l’asturianu y el gallego-asturianu.

La Conseyería d’Educación del Principáu, al traviés de la so web institucional educastur, vieno acabante d'espublizar les bolses d’interinos de les especialidaes de llingua asturiana y de gallego-asturiano. La contratación de docentes d’estes especialidaes pol sistema avezáu de llistes yera una reivindicación de coleutivos d’interinos y sindicatos que nun se viere algarada hasta l’añu 2006.

La resolución del departamentu de Recursos Humanos de la Conseyería lleva fecha de 25 de payares y abre un plaza hasta’l 10 d’avientu tanto pa profesores d’Educación Secundaria como pal cuerpu de maestros, especialistes en llingua asturiana y en gallego-asturianu.

Hasta 2006 Educación discriminaba a los interinos d’estes especialidaes con un sistema distintu al siguíu pal restu de les contrataciones y un grupu d’interinos organizáu en coleutivu llevo a fechu diverses protestes pa reivindicar l’apertura de llistes específiques. Les caberes vegas que s’abriera una bolsa d’estes especialidaes foi en 2011 y 2013.

Les irregularidaes na ufierta de l’asignatura en Secundaria, la non cobertura de baxes de Gallego-Asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria foron delles de les denuncies qu’esta mesma selmana facía’l sindicatu SUATEA y que lu facía reclamar un cambiu de rumbu urxente en política llingüística. Son casos como los de les Escueles Llerón-Clarín y Aniceto Sela de Mieres, onde l’alumnáu d’Educación Infantil (E.I.) venía recibiendo clases d’Asturianu dende hai cuantayá (nel Llerón-Clarín yá foi centru pilotu na implantación de l’asignatura d’asturianu nel añu 1984) y esti cursu tovía nun les reciben.

SUATEA y la Comunidá Educativa d’estos centros lleven reclamando dende primeros de cursu que s’ampliara’l contratu del profesor d’Asturianu a xornada completa nesi centru y que s’iguara’l casu del Colexu La Vallina de Lluanco onde un profesor d’Asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel. Lo mesmo pasa con otru grupu de sestu con 28 alumnos.

Fonte: Asturnews

SUATEA esixe un cambiu de rumbu urxente en política llingüística

SUATEA esixe a la Conseyería d’Educacón y cultura la dignificación llingüística y nin desanicie l’asturianu de la Educación infantil nin consienta ratios de 30 alumnos en Primaria.

Como fai alcordanza SUATEA nun comunicáu asoleyáu esti martes, el pasáu mes d’ochobre, el Parlamentu asturianu aprobó una Proposición non de Llei pola dignificación de la llingua asturianacol apoyu del PSOE, Podemos, IX y Foro y “nella, ínstase al Conseyu de Gobiernu a diseñar un plan de dignificación y normalización llingüística enantes del próximu periodu de sesiones”.

Y amás el conseyeru d’Educación y Cultura, Genaro Alonso, nes sos comparecencies públiques y nos conceyos realizaos a primeros de cursu con tolos sindicatos presentes na Xunta de Personal Docente, “comprometióse a meyorar el desarrollu de la Llei d’Usu y Promoción del asturianu y el so reforzamientu nel ámbitu educativu”. De la mesma manera, el Director Xeneral de Planificación lingüística, “mostróse comprometíu con estos principios y con dar solución a les reclamaciones que se-y treslladaron sobre tola riestra d’irregularidaes detectaes a los primero del cursu”.

Pero sigún denuncia SUATEA “estes intenciones y declaraciones concrétense na realidá nuna política continuista cola de gobiernos anteriores del PSOE y que consiste nel desaniciu de la enseñanza del Asturianu y del Gallego-Asturiano na Educación Infantil, la falta de siguimientu per parte de la inspección educativa d’irregularidaes na ufierta de l’asignatura en Secundaria, la non cobertura de baxes de Gallego-Asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria”.

Son casos como los de les Escueles Llerón-Clarín y Aniceto Sela de Mieres, onde l’alumnáu d’Educación Infantil (E.I.) venía recibiendo clases d’Asturianu dende hai cuantayá (nel Llerón-Clarín yá fue centru pilotu na implantación de l’asignatura d’asturianu nel añu 1984) y esti cursu tovía nun les reciben.

SUATEA y la Comunidá Educativa d’estos centros lleven reclamando dende primeros de cursu que s’amplie’l contratu del profesor d’Asturianu a xornada completa pa poder siguir impartiendo esta asignatura n’E.I: “Sangrante ya illegal (la llexislación vixente establez una ratio máxima de 25 alumnos pa grupos de Primaria), ye tamién el casu del Colexu La Vallina de Lluanco onde un profesor d’Asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel. Lo mesmo pasa con otru grupu de sestu con 28 alumnos. La Dirección del centru, igual qu’esti sindicatu, pidieron cuantayá l’ampliación a xornada completa del profesor pa poder desdoblar estos grupos y atender, cola calidá a la que tien derechu, a esti alumnáu”.

Asina, en viendo “la inacción flagrante de la Conseyería d’Educación y Cultura, del Serviciu de Planificación Llingüística y del Gobiernu del PSOE énte estos fechos acontecíos al entamu del supuestu camín de la Normalización Llingüística nel ámbitu educativu, nun mos queda otra que pidir un cambiu de rumbu de 180 graos si se quier cumplir col mandáu de la Xunta Xeneral del Principáu y colos derechos llingüísticos del alumnáu”.                                                                     Fonte: asturnews.com

#Yoapúntome: Entama la campaña matriculación en Llingua

   Como tolos años por estes feches, la Conseyería d'Educación, Cultura y Deporte del Principáu entama una campaña col nomatu y hashtag #yoapuntome que quier visibilizar la llinga asturiana na educación de nueso y espader que los escolinos y escolines escueyan llingua asturiana nos colexos. La campaña refuérzase col lema: "Porque falar asturianu ye saber muncho más" y vieno acompaña estos años d'atrás pol cartelu que fai compaña a estes llínies.

   La Conseyería d'Educación, Cultura y Deporte pon en marcha, el llunes 10 de xunu, una campaña informativa pa impulsar la matriculación en Llingua asturiana y Gallego-asturianu, col lema #yoapúntome, porque lo llevamos dientro / #euapúntome, porque lo levamos dentro. La difusión d'esta campaña fadráse gracies a dellos materiales que pueden descargase na so páxina web. A lo llargo de los próximos díes ta abiertu'l plazu pa matriculase, anque munchos centros ponen dificultaes na matriculación, como denuncia tolos años SUATEA.

   La enseñanza de la llingua asturiana entamó a impartise oficialmente en 1984, nuna serie de centros educativos públicos, aumentando'l númberu d'ellos nos años sucesivos. Estes enseñances impártense anguaño en 331 centros educativos. La matriculación dende l'añu 2013 pue facese alrodiu los dies 10 y 21 de xunu (pa Educación Primaria) y ente'l 2 y el 15 de xunetu (ESO y Bachilleratu).

   La Llingua asturiana y el Galllego-asturiau son materies de currículum que se pueden estudiar en tolos centros públicos d'Enseñanza Primaria y Secundaria. Col envís de llograr qu'esti fechu lu conozan la mayor cantidá posible de padres y d'alumnos/es, "ye polo la Conseyería pon en marcha una Campaña Informativa de Matriculación en Llingua asturiana/Galego-asturiano. Con ella, el Gobiernu d'Asturies quiera mosar el so apoyu a la enseñanza del asturianu, promover la conocencia d'un fechu cultural arriquecedor que forma parte de la nuesa identidá y que contribúi a la formación integral del alumnáu, respetando siempre la llibre opción y la voluntariedá del so deprendimientu", espliquen dende Política Llingüística.                                                            Fonte: Asturnews.com

CSI, SUATEA, CCOO y UGT refuguen el nuevu currículu d'ESO y Bachilleratu y reivindiquen la oficialidá del asturianu

Consideren que'l nuevu currículu conderga'l futuru del asturianu nes etapes cimeres del sistema educativu. Les cuatro fuercies sindicales roblen el viniente comunicáu conxuntu:

L'actual Conseyera d'Educación fixo públicu'l compromisu de creación de la especialidá de Llingua Asturiana a lo llargo de la presente llexislatura. A escasu tiempu de qu'ésta termine, les organizaciones sindicales SUATEA, Fete-UGT, Fe-CCOO y CSI, vemos frustrada esa espectativa y pa con ella la posibilidá de normalizar la situación de los docentes qu'imparten esta asignatura.

Na última resolución de la Xunta de Personal Docente non Universitariu, aprobada por unanimidá, esixíase la tramitación pela vía d'urxencia de la creación d'esta especialidá, cuestión especialmente importante nun contestu d'inminente aprobación d'un nuevu decretu estatal d'Especialidaes y de la inmediata aplicación del nuevu currículu LOMCE na enseñanza Secundaria y Bachilleratu.

Lloñe d'esto, la situación na que nos atopamos ye d'incertidume absoluta sobre la posibilidá d'avanzar na regularización de l'asignatura. Tres la respuesta del Ministeriu y la falta d'iniciatives concretes per parte de la Conseyería asturiana, el profesoráu va siguir avocáu a la so situación d'inestabilidá lo que repercute negativamente na calidá de la enseñanza.

Con too esto, la situación entá pudo dir a peor. L'alministración pon sobre la mesa una propuesta de currículu que supón una agresión directa a la presencia de la Llingua asturiana y del Gallego-asturianu na educación Secundaria y el Bachilleratu. Ye una propuesta qu'incumple la Llei d'Usu y marxina l'asignatura como nunca se fixera hasta agora.

Per un llau va competir con gran númberu de materies, per otru va esixise, pa ser cursada en cursos cimeros habela estudiáu con anterioridá, y como colofón, ve amenorgáu'l so horariu de 4 hores selmanales a 1 nel Bachilleratu.

Ye indefendible la posibilidá d'impartir con un mínimu calidá esta enseñanza y menos entá cumplir col currículu que para ella foi asignáu n'esti mesmu decretu. Una hora selmanal ye una burlla tantu pa los profesionales que tendrán d'impartila como pal alumnáu qu'opte al so aprendizaxe.

Na práctica, esti apueste de l'alministración educativa supón condergar, al curtiu plazu, el futuru del asturianu nes etapes cimeres, y tener nel futuru una incidencia negativa na escolarización nel restu d'etapes educatives. En tou casu manifiesta la nula intención de contribuyir al fomentu de la recuperación, desenvolvimientu y promoción del usu de la nuesa llingua, elementos que, xuntu col establecimientu de los medios qu'amparen el derechu de los cuidadanos a conocelo y usalo, constitúin l'oxetivu que marca la Llei d'Usu y promoción.

Consideramos que declarar oficial a la Llingua asturiana ye, nestos momentos, la midía que podría solucionar el so estatus nel ámbitu educativu y la única apuesta rial que impedirá la degradación total hasta la so desapaición.

Fonte: Infoasturies

SUATEA presenta alegaciones a los currículos d'ESO y bachilleratu

Piden la paralización de l'aplicación de la LOMCE n'Asturies.

 Dende SUATEA vienen de presentar altriques énte'l nuevu currículu remitíu pola Conseyería a les organizaciones sindicales. En primer llugar, critiquen qu'esti nuevu plan quiera implantase de cara al cursu que vien, con un plazu de tiempu pa la organización nos centros educativos qu'al so paecer fae d'ello dalgo inviable.

Amás, señalen que mientres la Conseyera realiza declaraciones públiques escontra la LOMCE, aplica la mesma nel enseñu asturianu de mena estricta, y con un procedimientu que, dao lo apurao del mesmu, apurre unos plazos d'altriques y modificaciones bien curtios. A too ello amiesten que la ufierta plantegada va dificultar enforma la organización nos centros de secundaria, polo que lo consideren un nuevu mal facer de la Conseyería.

En cuantes a estayes concretes, critiquen duramente que la relixón vaya ser materia evaluable, fechu que consideren favoratible pal adoctrinamientu relixosu y un currículu contradictoriu, que va facer a los escolinos deprender una enseñanza acientífica que, tal como manifiesten, debería desapaecer de la educación pública.

En cuantes a la Llingua Asturiana y el Gallego-asturiano, SUATEA considera que la so situación nun se correspuende col cumplimientu de la Llei d'Usu y Promoción, faciendo escoyer a los escolinos na ESO ente una segunda llingua estranxera, o cualesquiera de les dos llingües propies del país.

Fonte: Infoasturies

L'Academia amuesa la so "perxustificada alarma" pola situación de la enseñanza del asturianu nes estremaes estayes educatives

L’Academia de la Llingua Asturiana asoleyó esti día, nuna rueda de prensa, la so esmolición depués de venir siguiendo "con perxustificada alarma les noticies qu’estos caberos meses y díes arrodien la enseñanza de la Llingua Asturiana nes estremaes estayes educatives". L’Academia entiende que nel tresfondu de toa esta llamentable situación ta la testona realidá de que l’asturianu ye la única llingua del estáu español non oficial. Les esmoliciones de l'Academia recueyen "la negativa del Ministeriu d’Educación a inxerir nel Decretu d’Especialidaes Docentes la posibilidá de que la materia «Llingua Asturiana» pudiere ser una de les especialidaes pal profesoráu d’Educación Primaria y Secundaria. Y ello magar cuente con una enmienda del propiu Conseyu Escolar del Estáu que reclama tal posibilidá. Esta negativa ye, lóxicamente, responsabilidá del Ministeriu, pero tamién de la Conseyería d’Educación y Cultura d’Asturies que nun fexo por negociar al máximu nivel les condiciones de la petición". Pero eses esmoliciones tamién s'empobinen a "la inxustificable y allegal propuesta de la Conseyería d’Educación del Gobiernu d’Asturies p’allugar l’asignatura «Llingua Asturiana» dientro de la Educación Secundaria nunes condiciones d’optatividá –y competencia desigual– con 4 materies: Segunda Llingua Estranxera, Cultura Clásica, Aniciu a l’Actividá Entamadora y Empresarial y Materia Propuesta pol centru docente. Persabe’l Gobiernu d’Asturies qu’esto incumple dafechu l’artículu 10 de la Llei d’Usu del Asturianu, xustamente’l dedicáu al currículu, que diz: La escoyeta del estudiu o del emplegu del bable/asturianu como asignatura del currículu en nengún casu podrá servir de motivu de discriminación de los alumnos. Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu". Pala Academia, "la risible ya insultante decisión, tamién de l’alministración educativa n’Asturies, de camentar que l’asturianu pue deprendese nel Bachilleratu rebaxando de 4 a 1 hora selmanal la so docencia nunes condiciones d’axuste, amás, práuticamente imposibles pal alumnáu". L’Academia entiende que nel tresfondu de toa esta llamentable situación ta la testona realidá de que l’asturianu ye la única llingua del estáu español non oficial: "Esto nun almite duldes. De fechu, cuando’l Ministeriu refuga la especialidá pon como xida que l’asturianu nun ye oficial; y asina mesmo cuando la Conseyería nun ye a alcontrar el llugar qu’a la Llingua Asturiana-y correspondería nun currículu normal pa una comunidá billingüe, el problema, na práutica, vien a ser exautamente’l mesmu". Y ye qu’equí, n’Asturies, "intenta facese daqué imposible, xurídica y socialmente: caltener una llingua y una cultura al marxe del marcu constitucional de referencia que ye la oficialización. Esti ye’l camín lóxicu que siguieron los gallegos, los vascos, los navarros, los catalanes, los baleares y los araneses". Lo que camienta la institución ye que "la hestoria de más de 3 décades amuesa que cualquier pasu llegal que represente un encontu oxetivu pal caltenimientu del asturianu como llingua de cultura n’Asturies esfrónase de contino escontra’l fechu de que l’idioma de los asturianos nun ye oficial. Y esto han sabelo los partíos políticos asitiaos n’Asturies, de mou qu’agora que tamos en plenu periodu pre-ellectoral tienen que ser conscientes de que si nun planteguen y negocien la co-oficialidá de la llingua asturiana tán condenándola conscientemente a la so desapaición. Yá nun valen más vueltes nin más ambigüedaes: o se ta cola llingua y la cultura d’Asturies o se ta por facela desapaecer". En tou casu, la sociedá asturiana ha saber que l’Academia de la Llingua Asturiana "siempres tará alliniada con aquelles persones ya instituciones que defenden el derechu a usar l’asturianu n’igualdá de condiciones que’l restu de les llingües oficiales del Estáu". Fonte: Asturnews

SUATEA denuncia que "la Conseyería d’Educación vuelve a degradar la presencia de la llingua asturiana nel sistema educativu"

Señalen que'l borraor del nuevu currículu d’educación secundaria p’Asturies "reduz la carga horaria y dexa l’asignatura nuna situación tovía más precaria". 

Los borraores de decretu pelos que se regula n’Asturies el currículu d’educación secundaria (ESO y Bachilleratu) tán suponiendo una nueva agresión a la presencia de la llingua asturiana y del gallego-asturiano nel sistema educativu asturianu. Al marxe de les valoraciones xenerales y les referentes a otres materies que merecen toos dos testos, que suponen l’aplicación n’Asturies d’una llei nefasta como la LOMCE, no que toca a la llingua asturiana rescampla que:

1)    La materia apaez somorguiada nuna montonera d’asignatures optatives, lo que torga la so escoyeta per parte del alumnáu.

2)    Oblígase al alumnáu que garre l’asignatura nos cursos superiores a tenela estudiao los anteriores. Teniendo en cuenta que la materia d’asturianu sufre constantemente, y hasta bien avanzáu’l cursu, que-y saquen alumnos pa otres materies, o que directamente nun se los dexe matriculase por tener que facer hores de refuerzu n’otres materies, topámonos con que podría dase la situación de qu’un alumnu o alumna pase los cuatro años de la ESO ensin poder cursar l’asignatura queriendo facelo toos ellos.

3)    En bachilleratu l’asignatura baxa de 4 hores selmanales a 1, y compite cola materia de Relixón. Nun fai falta desplicar la barbaridá pedagóxica que supón una asignatura, y amás en bachilleratu, de la que namás s’imparte una hora a la selmana.

4)    La permanencia de les ratio mínimes en bachilleratu supón otra torga más pa la pervivencia de la materia.

Nesi sentíu, SUATEA quier amosar el so esmolecimientu pola situación que s’abriría, d’aprobase esti decretu, tanto pal alumnáu como pal profesoráu que la imparte, que sigue ensin ver aprobada la especialidá docente, tan necesaria pa la so estabilidá y que supondría una meyora evidente de les sos condiciones y de les de la propia materia.

Por too ello, SUATEA convoca asamblea específica pal profesoráu de llingua asturiana pal miércoles 25 de marzu a les 17:30 nel IES Aramo, d’Uviéu. Y dao qu’esta situación de degradación de la materia ye compartida con otres, convócase tamién otra xeneral de profesoráu pal mesmu día y llugar a les 18:30.

Con una lexislatura a piques de rematar, la conseyera n’exerciciu, Ana González, paez querer despedise del sistema educativu asturianu dexando’l mesmu mal tastu que dexaron los sos antecesores no que toca a la llingua del país.

Fonte: Infoasturies 

La XXXVI Selmana de les Lletres Asturianes va celebrase del 2 al 10 de mayu baxo’l lema ‘Semar palabres, texer futuru’

   La Conseyería d’Educación, Cultura y Deporte va celebrar la XXXVI Selmana de les Lletres Asturianes ente’l 2 y el 10 de mayu, polo que’l Día de les Lletres Asturianes va ser el vienres 8. El lema escoyíu nesta ocasión ye ‘Semar palabres, texer futuru’.

   Tres tar dedicada al cómic na edición pasada, esti añu la Selmana de les Lletres nun va centrase na figura de nengún escritor o xéneru lliterariu y va facelo nes pallabres y na creación escolar. “La promoción de los fechos culturales espresaos en llingua autóctona va ser una de les constantes d'esta edición de la Selmana de les Lletres, na que quier otorgase tamién un papel destacáu a la creación lliteraria escolar”, anuncien dende la conseyería. Asina, los microrrellatos y dibuxos ganadores del XX Certame de Creación Artística/Lliteraria’, nel que pue participar l’alumnáu de los distintos ciclos y etapes educatives, va protagonizar el llibru ‘Blimes nueves, bringas novas’, que va distribuyise de baldre nel Día del Llibru y el Discu n’Asturianu, coincidente col Día de les Lletres Asturianes.

   D’igual forma, mientres diez díes, dende’l Gobiernu asturianu va promocionase l’idioma con dellos eventos que van dende presentaciones de llibros a llectures públiques, coloquios, concursos o conciertos: “Creada en 1980, la Selmana de les Lletres Asturianes ye una celebración participativa d'homenaxe a los escritores, a les sos creaciones artístiques, a los llectores y al públicu; y ye tamién un homenaxe a la ferramienta comunicativa que fai posible esa lliteratura: la llingua asturiana y, na zona más occidental d'Asturies, el gallego-asturiano”.                                   Fonte: Asturies.com

La XDLA concentróse frente a Educación pa pidir la oficialidá

Un grupu de persones convocaes pola XDLA concentróse na mañana d'esti llunes frente a la Conseyería d'Educación. Reclamaron la oficialidá del idioma pa garantizar drechos llingüísticos.

Los manifestantes formaron con pallabres de gran tamañu la pallabra 'oficialidá' y protestaron pola situación que vive anguaño la Llingua Asturiana y Gallego-asturiano nel sistema educativu, asina como los mayestros énte la falta de la especialidá docente. "Nes últimes selmanes el Ministeriu y Conseyería d'Educación volvieron a enredase y a acabar faciendo qu'ente los dos se torguen los derechos d'estudiantes y profesores al negase la creación de la especialidá docente de Llingua Asturiana. 30 años d'escolarización precaria y falta de drechos llingüísticos nun-yos deben paecer abondo. Contra toles sides xurídiques que siempre ponen, llevamos munchos años diciéndolo: la solución ta ehí y llámase oficialidá", espresa la Xunta pola Defensa de la Llingua Asturiana (XDLA).

Fonte: Asturies.com

Entreguen n’Uviéu los Premios Lliterarios 2014

   El paraninfu de la Universidá d’Uviéu repite esti xueves como sede de la gala de los Premios Lliterarios 2014 qu’entrega la Conseyería d’Educación, Cultura y Deporte. El viceconseyeru Alejandro Calvo y Ana María Fueyo, direutora xeneral de Política Llingüística, acudirán en representación del Gobiernu.

   Mientres la seronda pasada aconceyaron los xuraos establecíos pa decidir la obra merecedora de caún de los cinco gallardones que convoca la conseyería, resultando ganadores Carlos González Espina, con ‘Cápsules de tiempo’ (VII Premiu María Xosefa Canellada de lliteratura infantil y xuvenil); Damián Barreiro, con ‘Caleya Sésamu: el papel de la televisión na tresmisión interxeneracional de la llingua’ (XX Premiu Máximo Fuertes Acevedo d’ensayu); Enrique Carballeira, con ‘L’arume de la tierra’ (VI Premiu Alfonso Iglesias de cómic); Antón García, con ‘Crónica de la lluz y la solombra’ (XXXV Premiu Xosefa Xovellanos de novela); y Ángeles Carbajal, con ‘L’aire ente la rama’ (XX Premiu Xuan María Acebal de poesía). Toos ellos van recibir una pieza artística esclusiva “otorgada en reconocencia a la calidá de les sos obres y la so significación como aportaciones sobresalientes y innovadores a la creación lliteraria en llingua asturiana”, de nome ‘Árbol de les lletres’, a lo qu’hai que sumar una recompensa de 3.000 euros.

   La gala va principiar a les 19.30 hores y nella destaca l’ausencia otru añu más de la conseyera Ana González. Tres la entrega de los gallardones va tener llugar una actuación de Mapi Quintana y Elías García, dúu que nel 2014 asoleyó'l discu ‘Severina’.                                     Fonte: asturies.com

Siguen les reaiciones de refugu pola negativa pa la creación de la especialidá docente d'asturianu

Dende la propia ALLA hasta l'ámbitu sindical, siguen les amueses de refugu a la decisión ministerial, con fuertes crítiques tamién al gobiernu asturianu.

Dende l'Academia de la Llingua Asturiana treslladen nun comunicáu que "ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes".

Nesi sen, ceyen "llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería".

Poro, consideren "inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique. L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones".

Les crítiques lleguen tamién pel ámbitu sindical, dende organizaciones como la CSI o SUATEA. Éstos últimos señalen que "la redacción d'esti nuevu decretu nun s'axusta al textu de la LOMCE, onde'l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d'oficial pudiesen mantener la so ufierta educativa. Esti ye'l casu d'Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía".

Apunten que "la situación anguaño ye complicada, y ye necesaria l'actuación urxente de tolos axentes implicaos, Academia,  Conseyería,  sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien".

Amesten tamién l'alcordanza "que'l Plenu del Conseyu Escolar del Estáu yá se pronunció nel mes de setiembre favorable a la creación d'esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa".

Amás, afiten qu' "esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d'Asturies pronuncióse favorable a la so creación na primavera pasada, asina como la Xunta de Personal Docente d'Asturies que se tien manifestao nel mesmu sentíu en delles ocasiones. Asina mesmo, la propia Conseyera d'educación Ana González tien manifestao en reiteraes ocasiones que yera un de los compromisos que quería cumplir enantes d'acabar la presente llexislatura col enfotu de dignificar y normalizar la presencia de la llingua asturiana nel sistema educativu".

Fonte: Infoasturies

IX va apelar na Xunta sobre la especialidá d'asturianu

   El grupu parlamentariu d'IX na Xunta Xeneral fizo ayeri l'anuncia de que'l xueves próximu va apelar a la Conseyera d'Educación sobre la especialidá d'asturianu. Na sesión del xueves, el grupu va apelar a la Conseyera d'Educación, Cultura y Deporte sobre la promoción del asturianu, más en concretu sobre la reconocencia de la especialidá de llingua asturiana pal profesoráu.

   L’anuncia de la Conseyería d'Educación de que va solicitar al Ministeriu d’Educación la especialidá docente de Llingua Asturiana fízose ya nel mes de mayu y dende entós nun hebo novedaes, siendo enforma criticada polos sindicatos por contrastar colo que consideraben un maltratu permanente a la materia.

   El grupu parlamentariu d'IX na Xunta Xeneral va llevar tamién esta selmana al plenu del próximu vienres una Proposición Non de Llei na qu'encamienta al Conseyu de Gobiernu a modificar el so alcuerdu de mayu de 2013 pol que s'aprueben modelos de clausules sociales nel ámbitu de contratación pública pa promover l'emplegu d'otres persones con dificultaes particulares d'insertamientu nel mercáu llaboral amás de les que sufran dalgún tipu de discapacidá, tal que fixeron otres alministraciones públiques. IX pretendi, como esplicó Aurelio Martín, favorecer a les ONG´s na contratación pública y la contratación de persones con discapacidá.

   Na sesión del xueves, el grupu va apelar a la Conseyera d'Educación, Cultura y Deporte sobre la promoción del asturianu, más en concretu sobre la reconocencia de la especialidá de llingua asturiana pal profesoráu.                                                                                        Fonte: asturnews.com