Llan del Cubel refuga que s'emplegue la so música pa fomentar les plantaciones d'ocalitos n'Asturies

El grupu folk declárase amás "belixerante" cola plantación d'ocalitos nel nuesu país

 

Llan  del  Cubel

   Llan de Cubel vien d'emitir un comunicáu al traviés de les sos redes sociales nel que'l grupu folk asturianu desplica que "les pasaes semanes fueron emitíes nuna emisora de radio n' Asturies una serie de cuñes publicitaries por parte de la papelera ENCE promoviendo ente los propietarios de montes en Asturies la plantación de ocalitos col fin de destinalos a la producción de pasta de papel. Esta campaña emitiose con música de fondo de Llan de Cubel", según apunten.

   Asina, el grupu "quier informar y aclarar que EN NINGÚN CASU se nos pidió permisu pa utilizar la nuesa música n'esta cuña y qu'el emplegu por tanto de la misma foi NON AUTORIZÁU y amás ILLEGAL porque nin siquiera se declaró a la SGAE. Puestos en contautu cola compañía ENCE se-yos solicitó que retiraran la campaña de forma INMEDIATA, cosa que ficieron, y nos pasaos díes Llan de cubel recibió una carta de la compañía pidiendo disculpes".

   Pa finar, el grupu declárase "belixerante" nesti tema, y quier expresar "el so rechazu más absolutu y contundente contra la plantación d'ocalitos n'Asturies y na cornisa cantábrica en xeneral, por tratase de una actividá completamente INSOSTENIBLE mediambientalmente que sólo conlleva la degradación de los montes y la destrucción del habitat autóctono. Económicamente amás estes plantaciones suponen el pan pa güei (escasu) y fame pa mañana, pues xeneren unos ingresos infinitamente menores que les plantaciones de maeres nobles, pa les qu'el clima cantábricu ye ideal y qu'amás non emprobecen el suelu del monte como nel casu les plantaciones d'ocalitos que colos años acaben convirtiéndose en eriales", afiten dende Llan de Cubel.                                                                Fonte: InfoAsturies