Bimenes celebra la XVIII Fiesta de la Oficialidá de la Llingua Asturiana

Cartelu de la XVIII Fiesta de la Oficialidá de la Llingua Asturiana,  Bimenes

     El 5 de xunetu del 1997 el Conceyu de Bimenes oficializaba la llingua asturiana, declaración torgada a lo poco pol Tribunal Constitucional. Pese a ello, sigue celebrándose l’acontecimientu con una fiesta qu’esti añu coincide na fecha.

   Son munches les persones que s’averen a Bimenes pa compartir colos yerbatos esta folixa reivindicativa que tien a Martimporra como sede. Los actos van principiar al meudía na Casa Conceyu cola intervención del alcalde, Alejandro Canteli, pa darréu dar pasu a la llectura del pregón del escritor y dibuxante Miguel Solís, miembru correspondiente de l’Academia de la Llingua Asturiana y l’autor de ‘Les llamuergues doraes’, la primer novela contemporánea en llingua asturiana. El Grupu Folklóricu Los Yerbatos baillará a les 12.45 hores la ‘Danza de la oficialidá’, pa depués entamar un pasucais xunto col Grupo Municipal-Folklórico Adeje, de Tenerife.

   Darréu, l’actividá va treslladase al polideportivu del Colexu Públicu Martimporra –sede de toles actividaes en casu de mal tiempu–, onde dambos grupos folclóricos van ufrir una actuación a les 13.30 hores. Pa les 15 hores ta prevista la xinta popular col menú tradicional compuestu por costielles, pitu y chorizos criollos, previa de la novedá principal de la fiesta d’esti añu: la celebración del I Concursu d'Escanciadores de Bimenes, puntuable pal Campeonatu d'Asturies d'Echadores de Sidra, que tien l’aniciu marcáu pa les 17.30 hores. Tres el mesmu, a les 19.30 hores, la Peña Bolística Rozaes va entamar una amuesa de cuatriada, y yá de nueche, a les 22 hores, Carlos Alba ‘Cellero’ va protagonizar el monólogu ‘El Pola: memories d'un kinki'. Va zarrar la folixa, a les 23 hores, l’actuación musical del Ensame Astur Los Yerbatos y Palaes de Ron.

El domingu, el concursu de gaita

    Completa’l programa de la XVIII Fiesta de la Oficialidá de la Llingua Asturiana el XV Concursu de Gaita de Bimenes, que va celebrar la final el domingu a les 17 hores nel polideportivu. Nél participen gaiteros menores de 21 años y repártense trés premios de 300, 200 y 100 euros. L’añu pasáu’l ganador foi’l sierense de 19 años Fernando Vázquez Cárcaba.                                                Fonte:  Asturies.com

Adxuntu	Tamañu
Dípticu XVIII Fiesta Oficialidá de la Llingua Asturiana.jpg	3.67 MB