Que'l fíu de Carlos Álvarez-Buylla Cores nun deprenda bable, por favor

 - Milio Rodríguez Cueto (Xixón)

  

Sí, quiero animar a don Carlos Álvarez-Buylla Cores, que publicó carta nesti diariu, el domingu 29 de xunu, protestando contra les materies de Llingua y Cultura Asturiana en Primaria. «Ya me preocuparé yo de enseñarle a mi hijo –como me enseñaron a mí mis padres– no el bable (porque, lo siento, no me gusta), pero sí la riqueza y las tradiciones de la cultura asturiana...», escribe. ¡Toi con él! Tamién yo sé lo que ye sufrir les imposiciones del Estáu en materia educativa. Tamién yo soi padre, y sufrí que la mio fía, educada nos primeros años de vida nun ambiente familiar asturfalante, tuviere que ser oxetu d’inmersión llingüística castellana que nun queríemos nin la madre nin yo. Ya se sabe: los ciudadanos, garraos d’a ún, somos mui poca cosa: nun nos queda más remediu que tragar. Pero, ánimu, señor Álvarez-Buylla: col correr de los años y los cursos, y pese a toles presiones de la escuela, la mio neña, que ya ye moza, salió «bablista», como diría usté. Nun dulde que’l so fíu, por más que la Conseyería s’empeñe en que conoza pallabres asturianes, acabará teniéndo-yos ascu, como usté escribió na so carta: eses coses mámense en casa. Fonte: La Nueva España