El Festival Arcu Atlánticu torna'l 25 de xunetu consolidáu como "ún de los atractivos del branu xixonés"

Na semeya, Couto, Rubiera y Martínez Salvador

    Del 25 de xunetu al 3 d’agostu va desenvolvese en Xixón la tercer edición del Festival Arcu Atlánticu, que nesta ocasión va mirar a Éire. Música, gastronomía y tradición axúntense pa facer d’esti certame “ún de los actractivos del branu xixonés”.

    El salón de recepciones del Conceyu de Xixón foi’l llugar escoyíu pa presentar el programa xeneral del eventu impulsáu pola Conceyalía d’Educación,Cultura, Mocedá y Festexos que dirixe Carlos Rubiera. L’edil tuvo acompañáu nel actu por Fernando Couto, conceyal de Desarrollu Económicu y Emplegu, y por Jesús Martínez Salvador, direutor del Xardín Botánicu Atlánticu, y destacó la importancia de la programación d’esta edición del Arcu Atlánticu, que va finar el domingu 3 d’agostu cola celebración del Día d’Asturies. Enantes, los seis conceyos que collaboren nel festival van tener tamién el so día propiu con programación especial: Cangues d’Onís, el sábadu 26; Cabrales, el 27; Nava, el 29; Siero, el 30; Villaviciosa, el 1; y Ribeseya, el 2.

    Pa informar de la bayura d’actividaes previstes nestos diez díes de festival, el Conceyu de Xixón editó un programa billingüe que va repartir nos díes próximos. En total, tiró 75.000 exemplares, de los que 50.000 van buzoniase y el restu distribuyise ente los centros municipales, el ferry a Naunnt-Saint-Nazère y entidaes collaboradores. Amás, van espublizase 1.000 folletos con información del certame n’inglés, francés y portugués. Pa promocionar el festival tamién van instalase 50 cartelos nos ‘mupis’ de la ciudá y van recuperase 40 marcos d’aceru cor-ten –cedíos pola Fundación Príncipe de Asturias– con información xenérica, per un lláu, y temática, pela otra.

    Rubiera destacó como novedá la situación de les carpes del festival, col averamientu de la zona agroalimentaria a los Xardinos de la Reina por pidimientu de los espositores. Va ser otra vuelta la zona d’El Muelle, Plaza Mayor y Campu Valdés onde va centrase la gran parte de l’actividá del Festival Arcu Atlánticu, anque tamién tán programaos eventos nel Centru de Cultura Antiguu Institutu y nel Xardín Botánicu Atlánticu. Por último, l’edil destacó’l patrociniu del Puertu de Xixón, el restaurante La Carbayera y Sidra Castañón, y la collaboración de la Fundación Príncipe de Asturias, l’Asociación Cultural L’Arribada, l’Asociación de Libreros del Principado, el Centro de Estampación Artística, Litografía Viña y Progestur.

Conciertos de tolos estilos

    Martínez Salvador encargóse de comentar la programación musical, “con tolos conciertos de baldre”, yá que la inauguración treslládase del Teatru Xovellanos a la Plaza Mayor. Ésta va celebrase’l vienres 25 a les 20 hores cola participación de la Banda de Música de Xixón y Piccola Piloñesa, y la interpretación de les pieces musicales ‘Ireland: Of legend and lore’, de Robert W. Smith; ‘La rapacina’ d’Enrique Reñé; y la obra celta pa banda y coru infantil de Bert Apermont ‘Celtic child’. Va zarrar la xornada, a les 22 hores, los irlandeses Buille, naturales de Corcaigh, población que toma’l relevu de Lisboa y Naunnt como ciudaes convidaes del Festival Arcu Atlánticu.

    Otros conciertos interesantes del certame son los de Vrienden (26, 20 hores), Luisa Sobral (26, 22 hores), The Christians (27, 22 hores), Muyeres y Morgan Le Cuff (28, 22..30 hores), Mapi Quintana y Elías García (29, 22.30 hores), Cerezal (30,21 hores), el proyeutu Albastur Cultural Exchange (30, 22 hores), The Real McKenzies (1, 22 hores), la Orquesta Céltica Asturiana (2, 22 hores) y Skinny Lister (3, 22 hores), ente otros. Éstos van repartise ente la Plaza Mayor, l’Antiguu Institutu y l’Escenariu Atlánticu, que va situase na punta Liquerique. Por último, Martínez Salvador faló de les actividaes del Botánicu, ente les que destaquen los itinerarios atlánticos, visites guiaes temátiques que va permitir conocer la flora común a los países del arcu atlánticu. Éstes van tener llugar los díes 26, 27, 2 y 3, n’horariu de 18 a 20 hores. La inscripción va abrise’l martes.

   Pela so parte, Couto faló de la estaya gastronómica, de la que s’encarga la so conceyalía, que va consistir na celebración del Salón d’Agroalimentación y Turismu del Festival Arcu Atlánticu n’El Muelle y l’entamu d’amueses de cocina na Plaza Mayor los díes 28 y 29 (21.30 hores) coa presencia de chefs procedente de dellos países del arcu atlánticu. Tamién ta previsto un concursu popular de nome ‘Arcu Chef’ y la celebración del I Alcuentru Cunfradíes Gastronómiques del Arcu Atlánticu, el sábadu 26. L’edil de Desarrollu Económicu apuntó que’l certame “consolídase como ún de los actractivos del branu xixonés” y destacó la inyeición económica que proporciona al sector turísticu de la villa. “Convierte a Xixón nun referente turísticu ente les ciudaes del arcu atlánticu”, amás de propiciar l’afitamientu “de llazos económicos y culturales” con estos territorios.   Fonte: Asturies.com