Trabe edita l'ensayu de Barreiro sobre la televisión y los procesos de recuperación identitaria

   La obra ganadora del VI Premiu Fierro Botas, ‘L’espeyu onde miranos: televisiones de proximidá n’Europa Occidental y procesos de recuperación identitaria’, yá ta disponible nes llibreríes. El so autor ye Damián Barreiro y la edición, de Trabe.

   Pendiente tovía de la presentación oficial por parte del Conceyu de Xixón, convocante del gallardón que tien como recompensa 3.000 euros y la espublización del ensayu, Ediciones Trabe encargóse de la so edición. Nél, el llector va atopar un trabayu rigurosu y estensu nel que’l periodista avilesín nacíu n’A Estrada repasa la historia de delles televisiones de proximidá europées claves nel procesu de recuperación llingüística y identitaria de los sos pueblos, pa depués analizar el papel que xuega anguaño la TPA n’Asturies. D’igual forma, Barreiro tamién cuenta nestes páxines les apaiciones que tuvo la llingua asturiana tanto na televisión como na radio y afonda na importancia de reflexar l’idioma del país en tolos xéneros, siempre poniendo sobre la mesa exemplos d’otros canales de territorios con llingua propia, pa crear una industria cultural y fortalecer una identidá propia.

   El Premiu d’Ensayu y Trabayos d’Investigación Fierro Botas, que concede l'Ayuntamientu de Xixón al traviés de la Conceyalía d'Educación, Cultura, Mocedá y Fiestes, tien como oxetivu recordar la figura del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconocer el llabor de los investigadores asturianos na llingua del país.

Alderique sobre ‘La tele que queremos’.      Barreiro ye una de les persones convidaes pa participar el miércoles nuna mesa redonda qu’entama la Xunta pola Defensa de la Llingua Asturiana (XDLA) baxo’l nome de ‘La tele que queremos. El papel d’un serviciu públicu de comunicación como normalizador del idioma’. El voceru de la organización, Carlos Pulgar, va ser el moderador d’una mesa redonda na que tamién van participar Carlos Menéndez Otero, profesor de la Universidá d’Uviéu; Óscar Vega, miembru del Comité d’Empresa de RTPA; y Xosé Antón Fernández ‘Ambás’, músicu y presentador. La hora prevista d’aniciu  ye les 19 hores nel Centru Social Okupáu Autoxestionáu La Madreña.

   Esti alderique va celebrase tres l’asoleyamientu por parte dela XDLA d’un documentu robláu, en primer instancia, por 26 coleutivos, ente ellos l’Academia de la Llingua Asturiana, con cinco puntos “irrenunciables” nel que demanden a los responsables políticos “unos medios públicos al serviciu d’Asturies”.     Fonte: Asturies.com