El Xueves de Comadres da entamu al Antroxu asturianu modernu

    Asturies va vivir dende esta nueche cinco díes de folixa, mázcares y gastronomía. Llega l’Antroxu, festividá asturiana que nel pasáu entamaba col solsticiu d’iviernu y qu’agora resúmese a les xornaes previes al Miércoles de Ceniza.

   La primer cita ye’l Xueves de Comadres, xornada nel que les muyeres axúntense pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considerase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla. Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles. Güei, la folixa treslladóse de la tarde a la nueche y munchos restaurantes ofrecen menús especiales pa esta xornada.

   Ye de destacar tamién el llabor de la Tertulia Feminista Les Comadres pa potenciar esta fecha festiva. Esti grupu de muyeres entama tolos años una espicha na qu’entreguen dos premios: el comadre d’oru y el felpeyu, ésti últimu a persones o entidaes que desprecien a la muyer. El premiáu d’esti añu ye l’Asociación de Mujeres Cineastas y de Medios Audiovisuales (CIMA) “pol so compromisu en facer visible y reivindicar el trabayu de les muyeres dientro del mundu de los medios audiovisuales que, como en munches otres actividaes, entovía güei ocupa un llugar discretu que, na mayoría de les ocasiones, nun se correspuende cola calidá enorme del resultáu. El títulu de felpeyu recala nel presidente del Executivu Estatal, Mariano Rajoy, “por ser el responsable últimu del anteproyeutu de ‘Llei de Proteición de los Derechos del Concebíu y de la Muyer Embarazada’, exemplu de les múltiples lleis que baxo’l so Gobiernu s’ellaboren en desterciu de los derechos y llibertaes de les muyeres”. Completen los gallardonaos el diputáu d’UPyD por València, Toni Cantó, que recibe’l títulu de Babayu “pola cantidá grande de babayaes que suelta nes redes sociales..., pero non sólo nelles”. La folixa, na que va tar mui presente el ‘Tren de la llibertá’, va tener llugar nel Llagar Castiello y va contar cola actuación d’Assia.

   Rio de Janeiro o Tenerife ganen a la tradición.     Los antroxos de Xixón y Avilés son los más importantes en cuantes a programa institucional y participación. Música y delles actividaes más orientaes a asemeyase a los carnavales de Rio de Janeiro, Tenerife o Cádiz qu'a otra cosa, protagonicen estes xornaes na que la xente participa antroxándose, anque con mázcares lloñes de la tradición. Los vienres ye habitual ver a los neños antroxaos nos colexos y en Xixón les charangues calienten motores pal concursu d’estes formaciones del sábadu y del domingu, que yá va pola so vixesimosétima edición, con una participación alta. El sábadu, los focos van p’Avilés, onde se celebra’l Descensu de Galiana a partir de les 18.30 hores. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.

      El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, n’especial la más mozo.

      El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos y les picatostes.

     En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares. Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa.

     Otra manera, al final d'esti reportaxe van poder disfrutar de delles Coples de Carnaval interpretaes por Jerónimo Granda, que va dar el pregón de les fiestes xixoneses d'Antroxu mañana, na Plaza Mayor, a partir de les 20.30 hores. Fonte:  Asturies.com