Darréu denuncia la "situación antidemocrática" que vive l'asturianu con motivu del Día de la Llingua Materna

   Vindiquen la declaración d'oficialidá de la llingua asturiana y un procesu de normalización llingüística nel país "claro y ensín prexuicios".

   "Un añu más, la nuesa llingua materna sigue ensín tener un tratu dignu dende les instituciones públiques y ensín vese reconocía como idioma oficial dientru'l nuesu país, polo que los asturfalantes somos ciudadanos de segunda". Con motivu de la celebración esti vienres del Día Internacional de la Llingua Materna, Darréu Mocedá d'Izquierda Soberanista Xunta Xeneral, denuncia'l silenciu institucional respeutu a esti día pola "falta de vergoña" que xenera "caltener una situación antidemocrática como la que vive la llingua d'Asturies nel so propiu dominiu". Vindiquen la declaración d'oficialidá de la llingua asturiana y un procesu de normalización llingüística nel país "claro y ensín prexuicios".

   Pa Darréu ye clave que la mocedá'l país esconsone y reclame con fuercia los derechos llingüísticos. "Les nueves xeneraciones tenemos qu'algamar una Asturies más llibre, xusta y digna y pa qu'eso seya posible tenemos de superar el conflictu llingüísticu, paráu pol mal momentu que vive'l movimientu de vindicación llingüística y pola actitú antidemocrática y aculturizadora del sucursalismu n'Asturies". Acusen a tolos partíos políticos con representación na Xunta Xeneral de ser "cómplices" de la situación que vive l'asturianu.   Fonte:  Qué ye ho!