Corvera dedica unes xornaes a la cultura de les naciones celtes

Na semeya, Molar y Veillon nuna imaxe del 1999

     Les Vegues va acoyer esta selmana la primer edición de les Xornaes Audiovisuales y Culturales de los Países Celtes. Del martes al vienres van entamase actividaes con protagonismu bretón, irlandés, gallegu y asturianu.

   Bras Rodrigo, direutor de la Banda de Gaites Corvera d’Asturies, ye la persona que fai realidá un proyeutu que va tener como sede Centru Socialcultural y el Teatru El Llar, y nel que collabora’l Conceyu de Corvera. Pese a que les actividaes oficiales van dar aniciu mañana, dende’l martes pasáu ya yé posible visitar, na sala d’arte del centru, la muestra pictórica ‘Mitoloxía femenina’, con obres de Marta Granda, que fai un percorríu poles femes de poder del arcu atlánticu. A esta esposición, que va permanecer abierta’l públicu hasta’l 19 de febreru, va sumase mañana, y hasta’l día 18, una amuesa de gaiterinos procedentes de la coleición privada de Rodrigo. El pública va poder disfrutar d’esta iniciativa, de nome ‘Na gaita traigo Asturies...’, n’antoxana d’El Llar.

   La primer sesión de les xornaes va tener llugar mañana nel teatru, a partir de les 18 hores, y va consistir na proyeición de ‘Bruxes’ (Éire/Asturies), un percorríu pela maxa dende presupuestos etnográficos y etnolóxicos. Darréu, va haber sitiu pa cuentos celtes, a cargu del Grupu de Teatru de Muyeres Mayores de Corvera, y pa la música, con una actuación de gaita de Rodrigo. El miércoles, l’activididá va pasar a la sala d’arte del centru y va principiar, tamién a les seis de la tarde, con una proyeición de ‘Camín de cantares’, una antoloxía del programa presentáu por Xosé Antón Fernández ‘Ambás’, y del documental ‘El diañu n’Asturies’, pa zarrar con una charra-alderique de nome ‘Cultura asturiana: enantes y agora’ na que van tomar parte los dos autores de les cintes, Ramón Lluis Bande y Berto Álvarez Peña, de manera respeutiva.

Música procedente de Breizh.      El xueves la música va tomar un protagonismu importante dientro de les xornaes, yá que ta prevista, pa les 20.30 hores, l’actuación del dúu bretón Jacky Molard & Jean Michel Veillon n’El Llar (tamién van ufrir conciertos mañana en L'Esperteyu y el día 18 nel Ca Beleño, les dos vegaes a les 21.30 hores). Enantes, nel salón d’actos del centru van poder vese curtios gallegos que muestren cuentos y tradiciones de los países celtes (18 hores) y la película irlandesa ‘El secreto de la isla de las focas (The Secret of Roan Inish)’, dirixida nel 1993 por John Sayles.

   La xornada cabera d’esta primer edición d’un certame que pretende tener continuidá nel tiempu, va centrar la mirada n’Enrique Castro ‘Quini’ y en Pablo Castañón. El delegáu actual del Sporting y ex futbolista internacional va tar presente n’El Llar a partir de les 19 hores, onde va proyeutase la película ‘El Brujo frente al espejo’, dirixida nel 2012 por Ray García. Mentes, l’actor mierense criáu en Corvera va recibir un homenaxe por parte de los sos vecinos a les 22.30. La Banda de Gaites de Corvera d’Asturies va encargase de zarrar les xornaes.

   Fonte:  Asturies.com