18/2/14

Samartín celebra'l Día Internacional de la Llingua Materna con una Uiquimaratón

Les actividaes van tener llugar na Casona del Bravial los díes 20 y 21 de febreru.

   Da-y presencia a la llingua asturiana nes nueves teunoloxíes ye ún de los aspeutos que más puen contribuyir a la so normalización. Por esi motivu, y coinciendo col Día Internacional de la Llingua Materna que se celebra’l próximu 21 de febreru, la Oficina de Normalización Llingüística de Samartín del Rei Aurelio va collaborar con un grupu de voluntarios de laUiquipedia pa llevar a cabu un taller esplicativu y una Uiquimaratón col envís d’enantar el númberu d’usuarios activos del proyeutu y aprovechar pa crear y ameyorar artículos enciclopédicos que tengan que ver col conceyu.

   Estes xornaes van entamar el xueves 20 a les 18:30 hores col saludu de les autoridaes, la presentación del proyeutu Wikimedia y un taller d’edición na Uiquipedia. Al día siguiente, de 6 a 9 de la tarde va llevase a cabu la Uiquimaratón na que los participantes van poder colgar artículos y semeyes rellacionaos con aquellos temes que más-yos interesen y que tengan que ver cola historia y el patrimoniu cultural de Samartín del Rei Aurelio.

La Wikipedia ye una enciclopedia llibre caltenida pola Fundación Wikimedia, una organización ensin ánimu de llucru. Los sos más de 15 millones de artículos tán escritos collaborativamente por usuarios de tol mundu y los más de los mesmos puen ser editaos por cualesquier persona con accesu a internet. Creóse en 2001 por Jimmy Walles y Larry Sanger y anguaño ye la obra de referencia más grande y popular d’internet. La Uiquipedia, la versión n’asturianu de la enciclopedia, alcuéntrase ente les más de 270 llingües que la componen y con un total de 19.400 artículos. Surdió en 2004.
Siguen asina les actividaes previstes pa celebrar los cuatro años de la Casona del Bravial de Blimea como centru cultural, qu’entamaron el día 6 cola inauguración de la esposición “El Castiellu de Blimea. Historia, lleendes, abandonu”, que pue visitase hasta’l próximu día 7.   Fonte: Qué ye ho!

3 comentarios:

  1. Hay qu'animase y participar nel eventu cultural del Día Internacional de la Lligua Materna, un día bien indicáu pa faer daqué pola llingua, que ye esti xueves y el vienres nel Bravial.

    ResponderEliminar
  2. Polo menos hai que faer bultu y collaborar daqué.

    ResponderEliminar

Los comentarios tán pendientes de moderación. Espublizaránse lo primero dable.