Diecisiete editoriales nel I Salón del Llibru Asturianu Solidariu.
El vienres, sábadu y domingu, la uvieína Plaza de Trescorrales va acoyer el I Salón del Llibru Solidariu. Nél van participar diecisiete editoriales que van donar un llibru a delles instituciones por cada exemplar que vendan. Les instituciones que van recibir estos llibros son el Centru Maternu Infantil d’Uviéu, la Xunidá Terapéutica y Educativa del Centru Penitenciariu de Villabona y los Centros Asturianos de fuera del Estáu, qu’atopen munches dificultaes pa consiguir llibros en castellanu y, de manera especial, n’asturianu. Nesti sen, hai que destacar que'l llibru donáu va ser el mesmu que l'escoyíu pol llector.
Otra manera, les editoriales que participen nesti I Salón del Llibru Solidariu son les diecisiete que formen el Gremiu d’Editores d’Asturies.
El programa previstu pa esta primer edición d’un eventu que busca continuidá nel tiempu ye un conciertu didáuticu sobre instrumentos tradicionales asturianos a cargu de Daniel García de la Cuesta que va tener llugar el vienres, a les 11.30 hores. Mentes, na mañana del sábadu, Olga Cuervo va sosprendenos colos sos cuentos (13 hores) y, yá pela tarde, La Bandina’l Tombo va ufiertar un conciertu (19.30 hores). L’horariu de venta del I Salón del Llibru Asturianu va ser de 11 a 15 hores, y de 17 a 21 hores.
Fonte: Asturies.com
¿Podría daquién faenos llegar a los que nun pudimos asistir el vienres pasáu al I Salón del Llibru Asturianu solidariu un breve resume de lo que foi l'eventu o de lo que vieron? gracies.
ResponderEliminar