La conceyalía de Cultura y Política Llingüística de L.lena presenta la campaña La sidra, d’Asturies. Esta iniciativa desendolcada pol Serviciu de Normalización Llingüística nagua por recuperar y afitar el vocabulariu del mundu de la sidra. Según señalen dende'l Conceyu de L.lena, esti vocabulariu «ta sufriendo un procesu de castellanización nos últimos años bien notable. Yá se siente na cai que la sidra faise en bodegues envede de llagares o que s’almacena en barrica en cuenta de toneles o pipes, por exemplu».
La campaña que va repartirse nes sidreríes del conceyu, fíxose en collaboración cola Rede de Normalización Llingüística nos Conceyos. Amás, de la collaboración de la Xunta pola Defensa de la Llingua Asturiana que cedió una anterior campaña La sidra como tien que ser.
La campaña consta d’un cartelu onde se puen lleer espresiones asturianes referíes a la sidra y vien acampañada por un llibretín, del que s’editaron 2.500 exemplares, onde se desplica’l procesu de fabricación de la sidra, y un poco d’hestoria y espresiones sidreres. Editáronse tamién unes 600 pegatines pa colocar nos nun me chisques, aparatos onde s’echa la sidra. Esta campaña cunta con una sovención de la Conseyería de Cultura y Turismu de 1.700 euros.
Fonte: Les Noticies
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.