Xandru Armesto, del coleutivu Softastur, tuvo desplicando xunto a otros miembros d’esta asociación qué ye esautamente’l software llibre, qué momentu vive y qué posibilidaes abre pa una llingua minorizada y marxinada pol so propiu gobiernu, como l’asturiana, na Tertulia Enrique García Rendueles y nuna de les xornaes con más participación. La charra y el posterior alderique sirvió pa que munchos resolvieren duldes alredor del software llibre y pa dar a conocer la bayurosa ufierta de programes que permite remanar el sistema operativu Ubuntu, que ta tornáu al asturianu dende va tiempu.
Amás los miembros de Softastur dieron a conocer el so llabor, que los convierte, pese a ser un grupu pequeñu, nún de los equipos de torna con más trabayu fechu, siendo l’asturianu nel añu pasáu la novena llingua más tornada n’Ubuntu.
Los miembros de Softastur convidaron a participar de les sos xornaes d’instalación, pa pasase a Ubuntu nos ordenadores, y a los conocedores del asturianu, a sumase como traductores de programes.
Fonte: Asturnews
Quiciabis el nuesu futuru seya la rede. De toes formes la oficialidá del asturianu ye un drechu de xusticia pal nuesu pueblu.
ResponderEliminar